വ്യക്തി ശുചിത്വവും പരിസര ശുചിത്വവും പരമപ്രധാനമാണ്. അധികമായാൽ അമൃതും വിഷമെന്ന് പറയുന്നത് പോലെ ‘വൃത്തി’ അധികമായാലും പ്രശ്നമാണെന്ന് എത്ര പേർക്കറിയാം?
വൃത്തിയായി ഇരിക്കാൻ നിരന്തരം കൈ കഴുകുകയും മുഖം കഴുകുകയും ചെയ്യുന്നവരുണ്ട്. അമിതമായി കൈ കഴുകുന്നത് പലപ്പോഴും ഒബ്സസീവ്-കംപൾസീവ് ഡിസോർഡർ (OCD) എന്ന് അറിയപ്പെടുന്ന മാനസിക വൈകല്യങ്ങളുമായി ബന്ധപ്പെട്ടിരിക്കുന്നു. രോഗാണുക്കളെ കുറിച്ചുള്ള ആശങ്കകളാണ് തുടരെ കൈ കഴുകണമെന്ന ചിന്ത ജനിക്കുന്നത്. അമിതമായി കൈകൾ കഴുകിയാൽ സുരക്ഷിതമാണെന്ന തോന്നലാണ് ഇതിന് പിന്നിലെ മറ്റൊരു കാരണം.
ഇടയ്ക്കിടെ കൈ കഴുകുന്നതും ഹാൻഡ് സാനിറ്റൈസർ തുടങ്ങിയവ അമിതമായി ഉപയോഗിക്കുന്നതും ചർമ പ്രശ്നങ്ങൾക്ക് കാരണമാകും. ചർമത്തിലെ എണ്ണമയം നീക്കി വരൾച്ച, തിണർപ്പ്, വീക്കം, ചൊറിച്ചിൽ എന്നിവയ്ക്കുള്ള സാധ്യതയുണ്ട്. കൈപ്പത്തിയിലും വിരലുകൾക്കിടയിലെയും തൊലി പോകുന്നത് ഇതിന്റെ ലക്ഷണമാണ്. ഇത് ക്രമേണ എക്സിമ, ഡെർമറ്റൈറ്റിസ് പോലുള്ള അവസ്ഥകളിലേക്ക് നയിക്കും.
ശുചിത്വം പാലിക്കുന്നതിനും അണുക്കളിൽ നിന്ന് സംരക്ഷണമേർപ്പെടുത്തുന്നതിനുമായി പ്രതിദിനം അഞ്ച് മുതൽ 10 തവണ വരെ കൈ കഴുകുന്നതിൽ തെറ്റില്ലെന്നാണ് ബെംഗളൂരുവിലെ ആസ്റ്റർ വൈറ്റ്ഫീൽഡ് ആശുപത്രിയിലെ ഇൻ്റേണൽ മെഡിസിൻ കൺസൾട്ടൻ്റ് ഡോ. എസ്എം ഫയാസ് പറയുന്നു. ഭഭണത്തിന് മുൻപും ശേഷവും, ബാത്റൂമിൽ പോയശേഷം, ജലദോഷം, ചുമ, തുമ്മൽ എന്നിവയുള്ളപ്പോഴും കൈകൾ നിരന്തരം കഴുകി വൃത്തിയാക്കണം.
കൈകളിലെ ജലാംശം നിലനിർത്താനും പ്രത്യേകം ശ്രദ്ധിക്കണം. സറിൻ, ഷിയ ബട്ടർ അല്ലെങ്കിൽ സെറാമൈഡുകൾ പോലുള്ള ചേരുവകൾ അടങ്ങിയ ഹാൻഡ് ക്രീം അല്ലെങ്കിൽ ലോഷനുകൾ ഉപയോഗിക്കാം. ചെറുചൂടുള്ള വെള്ളത്തിൽ കൈ കഴുകുന്നതും നല്ലതാണ്. കട്ടി കുറഞ്ഞ ലോലമായ തുണി വച്ച് കൈകൾ തുടയ്ക്കാനും ശ്രദ്ധിക്കണം.
