അഹമ്മദാബാദ്: ദേശീയ സീനിയർ വനിതാ ഏകദിന ക്രിക്കറ്റ് ടൂർണ്ണമെൻ്റിൽ മുംബൈയോട് തോറ്റ് കേരളം. 75 റൺസിനായിരുന്നു കേരളത്തെ മുംബൈ പരാജയപ്പെടുത്തിയത്. ആദ്യം ബാറ്റിംഗിനിറങ്ങിയ മുംബൈ 50 ഓവറിൽ ഏഴ് വിക്കറ്റ് നഷ്ടത്തിൽ 286 റൺസെടുത്തു. എന്നാൽ 211 റൺസെടുത്ത കേരളത്തിന്റെ വനിതകൾ 46-ാം ഓവറിൽ ഓൾ ഔട്ടാവുകയായിരുന്നു.
അർദ്ധസെഞ്ച്വറികൾ നേടിയ റിയ ചൗധരിയുടെയും സിമ്രാൻ ഷെയ്ഖിന്റെയും ഇന്നിങ്സുകളാണ് മുംബൈയ്ക്ക് വേണ്ടി മികച്ച സ്കോർ സമ്മാനിച്ചത്. ഇരുവരും ചേർന്ന് മൂന്നാം വിക്കറ്റിൽ നേടിയ 93 റൺസ് മുംബൈയ്ക്ക് കരുത്തായി.
മറുപടി ബാറ്റിംഗിന് ഇറങ്ങിയ കേരളത്തിന് മുൻനിര ബാറ്റിംഗ് പ്രതീക്ഷയ്ക്കൊത്ത് ഉയരാതെ പോയതാണ് തിരിച്ചടിയായത്. 48 റൺസെടുക്കുന്നതിനിടെ തന്നെ കേരളത്തിന് നാല് വിക്കറ്റ് നഷ്ടമായി. മധ്യനിരയിൽ അക്ഷയയുടെ ഒറ്റയാൾ പോരാട്ടമാണ് കേരളത്തെ വലിയ തോൽവിയിൽ നിന്ന് രക്ഷിച്ചത്. അക്ഷയ 69 പന്തിൽ 74 റൺസ് നേടി. മുംബൈയ്ക്ക് വേണ്ടി സായാലി, ജാഗ്രവി എന്നിവർ മൂന്ന് വിക്കറ്റ് വീതം വീഴ്ത്തി.
