ഉണക്ക മുളക്, വറ്റൽ മുളക്, ചുവന്ന മുളഴക്, കൊല്ലൻ മുളക് എന്നൊക്കയുള്ള പേരുകളിൽ അറിയപ്പെടുന്ന മുളക് കറികളിൽ അലങ്കാരവും രുചിക്കും പ്രധാനമാണ്. എരിവിനും പ്രത്യേക രുചിക്കുമായി ചേർക്കുമെങ്കിലും ചുവന്ന മുളകിനേറെ ഗുണങ്ങളുമുണ്ട്.
ചുവന്ന മുളകിലെ കാപ്സെയാസിൻ എന്ന ഘടകമാണ് ആരോഗ്യ ഗുണങ്ങൾ നൽകുന്നത്. കലോറി കത്തിച്ച് ശരീരഭാരം നിയന്ത്രിക്കാനും ശരീരത്തിലെ ഊഷ്മാവ് വർദ്ധിപ്പിച്ച് അപചയ പ്രക്രിയ വർദ്ധിപ്പിക്കുന്നതിനും വറ്റൽ മുളക് സഹായിക്കുന്നു. ജലദോഷം, സൈനസ് അണുബാധകൾക്കെതിരെ പോരാടനും വേദനകളെ ലഘൂകരിക്കാനും കൊല്ലൻ മുളക് സഹായിക്കുന്നു.
ഗുണങ്ങളിൽ സമ്പന്നനാണെങ്കിലും വറ്റൽ മുളകിന് ആയുസ് കുറവാണെന്ന പരാതി വ്യാപകമാണ്. കടകളിൽ നിന്ന് വാങ്ങിച്ച് രണ്ടോ മൂന്നോ ആഴ്ചയ്‌ക്കുള്ളിൽ പൂപ്പലേൽക്കുന്നത് പതിവാണ്. കുപ്പി പാത്രത്തിൽ സൂക്ഷിച്ചാൽ പോലും പൂത്ത് പോകാറുണ്ട്. എന്നാൽ പൂപ്പലിനെ തുരത്താൻ വഴിയുണ്ട്..
ഈർപ്പം നിലനിൽക്കുന്നതാണ് പൂപ്പലിന് കാരണമാകുന്നത്. അതുകൊണ്ട് സ്റ്റൗവിനോ അടുപ്പിനോ സമീപം മുളകുകൾ സൂക്ഷിക്കരുത്. വറ്റൽ മുളക് വെയിലത്ത് വച്ച് ഉണക്കി വായു കടക്കാത്ത പാത്രങ്ങളിൽ അടച്ച് ഫ്രിഡ്ജിൽ സൂക്ഷിക്കാവുന്നതാണ്. ഫ്രീസറിലും ഇത്തരത്തിൽ സൂക്ഷിക്കാം. നന്നായി പൊതിഞ്ഞ് പ്ലാസ്റ്റിക് കവറിലാക്കി, ഇത് കുപ്പിയിലടച്ചും ഫ്രിഡ്ജിൽ സൂക്ഷിക്കാം. ഒരു വർഷത്തോളം വരെ കേടുകൂടാതെയിരിക്കുമെന്നാണ് പറയുന്നത്. സമയം കളയാതെ പരീക്ഷിച്ച് നോക്കിക്കോളൂ..
