‘ഹെൽത്തി ഫുഡ്’ എന്ന ചിന്തയാണോ? ‘ഓർത്തോറെക്സിയ’ എന്ന രോഗമാകാം, ഈ ലക്ഷണങ്ങൾ നിങ്ങൾക്കുണ്ടോ??

‘ഹെൽത്തി’ ആയി ഇരിക്കാൻ ‘ഹെൽത്തി’ ഭക്ഷണങ്ങൾ കഴിക്കണമെന്നും ‘ഹെൽത്തി’ ലൈഫ്സ്റ്റൈൽ പിന്തുടരണമെന്നും നമുക്കറിയാം.. എന്നാൽ ഈ ചിന്ത അ​ഗാധമായി പിടികൂടുന്ന അവസ്ഥയെ ഒരു ​രോ​ഗമായാണ് ശാസ്ത്രലോകം കണക്കാക്കുന്നത്.

ഓർത്തോറെക്സിയ നെർവോസ (Orthorexia nervosa) എന്ന് ഗവേഷകർ ചെല്ലപ്പേരിട്ട് വിളിക്കുന്ന ഈ അവസ്ഥയെക്കുറിച്ച് കൂടുതലറിയാം..

ആരോ​ഗ്യകരമായ ഭക്ഷണങ്ങൾ കഴിക്കണമെന്ന ചിന്ത വിടാതെ പിടിമുറുക്കുന്ന അവസ്ഥയാണിത്. ഈ രോ​ഗത്തിന്റെ ലക്ഷണങ്ങൾ ഇതെല്ലാമാണ്..

ഓരോ നേരവും കഴിക്കേണ്ട ആഹാരത്തെക്കുറിച്ച് അമിതമായി ചിന്തിക്കുന്നു. കൂടുതൽ സമയമെടുത്ത് ആസൂത്രണം ചെയ്യുന്നു. ആരോ​ഗ്യകരമായ ഭക്ഷണങ്ങളെക്കുറിച്ച് റിസർച്ച് ചെയ്ത് ഒരുപാട് സമയം കളയുന്നു. അല്ലെങ്കിൽ ഇതുസംബന്ധിച്ച ​ഗവേഷണങ്ങൾക്കായി അമിതമായി സമയം ചെലവിടുന്നു. ഇതെല്ലാം ഓർത്തോറെക്സിയ എന്ന അവസ്ഥയുടെ ലക്ഷണങ്ങളാണ്.

ആരോ​ഗ്യമുള്ള ഭക്ഷണം കഴിക്കണമെന്ന ചിന്ത ഒരു വിഭ്രാന്തി പോലെയാവുകയും ചിലപ്പോൾ ഭക്ഷണം കഴിക്കുന്നത് തന്നെ ഇല്ലാതാകുന്ന അവസ്ഥയിലേക്ക് എത്തുകയും ചെയ്യും. സുഹൃത്തുക്കളും സഹപ്രവർത്തകരും ബന്ധുക്കളുമൊക്കെ കഴിക്കുന്ന പല ഭക്ഷണങ്ങളും നിങ്ങളുടെ കണ്ണിൽ അനാരോ​ഗ്യകരമായി തോന്നുന്നതിനാൽ പല ​ഒത്തുചേരൽ ചടങ്ങുകളും ഒഴിവാക്കാനുള്ള പ്രേരണയുണ്ടാകുന്നു. ഇത് പിന്നീട് നിങ്ങളുടെ നിത്യജീവിതത്തെയും ബന്ധങ്ങളെയും മൊത്തത്തിലുള്ള ക്ഷേമത്തെയും ബാധിക്കാൻ തുടങ്ങും.

സ്വയം സൃഷ്ടിച്ച ചില ചട്ടങ്ങൾ (ആരോ​ഗ്യമുള്ള ഭക്ഷണം കഴിക്കുന്നതുമായി ബന്ധപ്പെട്ട്) പാലിക്കാൻ കഴിയാതെ പോയാൽ അത് നിങ്ങളിൽ കുറ്റബോധവും ഉത്കണ്ഠയും ഉണ്ടാക്കുന്നതിന് കാരണമാകും. പോഷകാഹാരക്കുറവ്, ക്രമാതീതമായി ഭാരം കുറയൽ/വർദ്ധിക്കൽ, ക്ഷീണം, വിഷാദം എന്നിവ അഭിമുഖീകരിക്കേണ്ടി വരുന്നു.

ഹെൽത്ത് ഇൻഡസ്ട്രിയിൽ വരുന്ന ട്രെൻഡുകൾ, മാദ്ധ്യമങ്ങളിലെ വാർത്തകൾ, വീഡിയോകൾ എന്നിവയെല്ലാം ഈ ഭക്ഷണ ക്രമക്കേടിലേക്ക് നമ്മെ തള്ളിവിടാൻ കാരണങ്ങളാണ്. ഓർത്തോറെക്സിയ ബാധിച്ചാൽ തെറാപ്പികളും കൗൺസിലിം​ഗുമാണ് ഏക പോംവഴി.