ബെംഗളൂരു : തന്റെ പുതിയ സിനിമയുടെ പേരിന്റെ ഭാഷയെ കുറ്റപ്പെടുത്തുന്ന വിധം ചോദ്യം ചോദിച്ച റിപ്പോർട്ടർക്ക് കിച്ചാ സുദീപിന്റെ ഉരുളക്കുപ്പേരി പോലെയുള്ള മറുപടി. കന്നഡ സൂപ്പർ താരം കിച്ചാ സുദീപ് തന്റെ വരാനിരിക്കുന്ന ചിത്രമായ മാക്സിന്റെ ഇംഗ്ലീഷ് തലക്കെട്ടിനെ ചോദ്യം ചെയ്തപ്പോഴാണ് രസകരമായ സംഭവങ്ങൾ അരങ്ങേറിയത്.
തന്റെ വരാനിരിക്കുന്ന ചിത്രമായ മാക്സിന്റെ പ്രൊമോഷനുകളുടെ ഭാഗമായി പത്ര ലേഖകരെ കാണുകയായിരുന്നു കന്നഡ സൂപ്പർസ്റ്റാർ കിച്ചാ സുദീപ്. അതിനിടെയാണ് നാടകീയ രംഗങ്ങൾ അരങ്ങേറിയത്.
ഒരു കന്നഡ സിനിമയാണെങ്കിലും മാക്സിന് എന്തിനാണ് ഇംഗ്ലീഷ് പേര് തിരഞ്ഞെടുത്തതെന്ന് നടനോട് ഒരു പത്ര റിപ്പോർട്ടർ ചോദിക്കുകയായിരുന്നു. സുദീപ് ആ വ്യക്തിയെ വളരെ നേരം കണ്ണിമവെട്ടാതെ നോക്കി നിന്നു. അതിനു ശേഷം തന്റെ മുന്നിൽ വെച്ചിരുന്ന മൈക്കുകളിലേക്ക് വിരൽ ചൂണ്ടിയ നടൻ , എത്ര ചാനലുകളുടെ പേരുടെ പേരുകൾ ‘ഇംഗ്ലീഷിൽ ‘ ഉണ്ടെന്ന് ചോദിച്ചു. ചിത്രത്തിന്റെ ഇംഗ്ലീഷ് പേരിനെ വാർത്താ സമ്മേളനത്തിൽ ന്യായീകരിച്ച നടൻ കർണാടകയിലെ ജീവിതത്തിന്റെ വിവിധ വശങ്ങളിൽ ഇംഗ്ലീഷിന്റെ വ്യാപനം എടുത്തുകാണിച്ചു .
“ഇവിടെ വന്നവർ കന്നഡക്കാരാണ്, ഇത് കർണാടകത്തിൽ കാണും. ഞാൻ കന്നഡയിലാണ് സംസാരിക്കുന്നത്. ഞങ്ങൾക്ക് ഇവിടെ ഇംഗ്ലീഷ് മീഡിയം സ്കൂളുകളുണ്ട്. അവിടെ പോകുന്നവർ കന്നഡിഗരാണ്. അപ്പോൾ നിങ്ങളുടെ പ്രശ്നം എന്താണ്?” സുദീപ് ചോദിച്ചു. ഇതിന്റെ വീഡിയോ ഇപ്പോൾ വൈറലായിരിക്കുകയാണ്
വിക്രാന്ത് റോണയിലാണ് സുദീപ് അവസാനമായി അഭിനയിച്ചത്. അനുപ് ഭണ്ഡാരി സംവിധാനം ചെയ്ത ചിത്രം 2022-ൽ റിലീസ് ചെയ്തു. മാക്സ് ക്രിസ്മസ് ദിനമായ ഡിസംബർ 25-ന് റിലീസ് ചെയ്യും.
