കൊച്ചി: ആർഎസ്എസ് സർസംഘചാലക് ഡോ. മോഹൻ ഭാഗവതിന്റേതടക്കം ഹിന്ദുത്വം സംബന്ധിച്ച മൂന്ന് പ്രഭാഷണങ്ങൾ ഉൾപ്പെടുത്തിയ ഹിന്ദുത്വം – സമകാലിക ആവിഷ്കാരം പുസ്തകം പ്രകാശനം ചെയ്തു. എളമക്കര ഭാസ്കരീയം കൺവൻഷൻ സെന്ററിൽ ആർഎസ്എസ് അഖില ഭാരതീയ സഹ പ്രചാർപ്രമുഖ് പ്രദീപ് ജോഷിയാണ് പുസ്തകം പ്രകാശനം ചെയ്തത്. ജന്മഭൂമി മുൻ മുഖ്യപത്രാധിപരും എഴുത്തുകാരനുമായ പി. നാരായണൻ പുസ്തകം ഏറ്റുവാങ്ങി.
കുരുക്ഷേത്ര പ്രകാശനാണ് പ്രസാധകർ. ആർഎസ്എസ് സഹ സർകാര്യവാഹ് അരുൺകുമാർ, അഖിലഭാരതീയ കാര്യകാരി അംഗം സുരേഷ് സോണി എന്നിവർ ഹിന്ദുത്വം സംബന്ധിച്ച ആഖ്യാനങ്ങളെക്കുറിച്ച് നൽകിയ മാർഗദർശനവും പുസ്തകത്തിന്റെ ഉള്ളടക്കമാണ്. ആർഎസ്എസ് ദക്ഷിണ കേരള പ്രാന്ത കാര്യകാരി അംഗം പാ. സന്തോഷാണ് പ്രഭാഷണങ്ങൾ മലയാളത്തിലേക്ക് വിവർത്തനം ചെയ്തത്.
പരിപാടിയിൽ കുരുക്ഷേത്ര മാനേജിങ് ഡയറക്ടർ കാ.ഭാ സുരേന്ദ്രൻ പുസ്തക പരിചയം നടത്തി. ആർഎസ്എസ് ദക്ഷിണ ക്ഷേത്ര കാര്യവാഹ് എം. രാധാകൃഷ്ണൻ പങ്കെടുത്തു.
