എറണാകുളം: ഹണി റോസിന്റെ ഫെയ്സ്ബുക്ക് പോസ്റ്റിന് താഴെ മോശം കമന്റിട്ടവർക്കെതിരെ പരാതി നൽകി നടി. സ്ത്രീവിരുദ്ധ കമന്റിട്ടവർക്കെതിരെ എറണാകുളം സെൻട്രൽ പൊലീസിലാണ് പരാതി നൽകിയത്. സംഭവത്തിൽ അന്വേഷണം തുടങ്ങിയതായി പൊലീസ് അറിയിച്ചു.
ദ്വയാർത്ഥ പ്രയോഗങ്ങളിലൂടെ ഒരു വ്യക്തി തന്നെ മനഃപൂർവ്വം അപമാനിക്കാൻ ശ്രമിക്കുന്നുണ്ടെന്ന് വ്യക്തമാക്കി ഹണി റോസ് ഫെയ്സ്ബുക്ക് പോസ്റ്റിട്ടിരുന്നു. ഞായറാഴ്ച രാവിലെയാണ് നടി പോസ്റ്റിട്ടത്. ഇതിന് താഴെ അത്യധികം മോശമായ കമന്റുകൾ പ്രത്യക്ഷപ്പെട്ടു. എന്നാൽ എപ്പോഴത്തെയും പോലെ ഇതും കണ്ടില്ലെന്ന് നടിക്കാൻ ഹണി റോസ് ഒരുക്കമായിരുന്നില്ല. അവർ എറണാകുളം സെൻട്രൽ പൊലീസ് സ്റ്റേഷനിലെത്തി പരാതി നൽകി.
ഹണി റോസിന്റെ ഫെയ്സ്ബുക്ക് പോസ്റ്റ് വലിയ രീതിയിൽ ചർച്ചയായിരുന്നു. മോശം കമന്റ് പരസ്യമായി പറഞ്ഞ് ഒരാൾ തുടർച്ചയായി അപമാനിക്കാൻ ശ്രമിക്കുമ്പോൾ ഇത്രയും കാലം പ്രതികരിക്കാതിരുന്നത് അത് ആസ്വദിക്കുന്നതിനാൽ അല്ലെന്ന് നടി വ്യക്തമാക്കി. ഇത്തരം പുലമ്പലുകളെ പുച്ഛത്തോടെയും സഹതാപത്തോടെയും അവഗണിച്ചത് തിനിക്ക് പ്രതികരണശേഷി ഇല്ലാത്തതുകൊണ്ടല്ലെന്നും നടി അടിവരയിട്ട് പറഞ്ഞു. ഏതുവ്യക്തിയാണ് അപമാനിക്കുന്നതെന്ന് വ്യക്തമാക്കുന്നില്ലെങ്കിലും ഹണിയുടെ ഫെയ്സ്ബുക്ക് പോസ്റ്റ് വൻ ചർച്ചയായിരുന്നു.
