ആലപ്പുഴ: ചെങ്ങന്നൂരിൽ നടന്ന സരസ് മേളയിൽ ഏവരുടെയും ശ്രദ്ധയാകർഷിച്ച് നടൻ മോഹൻലാൽ. പരിപാടിക്കെത്തിയ താരത്തെ പൂച്ചെണ്ട് നൽകി സ്വീകരിക്കാൻ മന്ത്രി സജിചെറിയാൻ ക്ഷണിച്ചത് ചെങ്ങന്നൂർ നഗരസഭയിലെ മുതിർന്ന ഹരിതകർമ സേനാംഗം പൊന്നമ്മച്ചേച്ചിയെയായിരുന്നു. പൂച്ചെണ്ട് സ്വീകരിച്ച് ലാൽ പൊന്നമ്മ ചേച്ചിയെ മാറോടണച്ചതോടെ സദസിലും വേദിയിലും കൈയടികൾ ഉയർന്നു. നടൻ അപ്രതീക്ഷിതമായി ചേർത്തുനിർത്തിയതോടെ പാെന്നമ്മ ചേച്ചിയുടെ സന്തോഷവും ഇരട്ടിയായി. ഇത് സോഷ്യൽ മീഡിയയിലും വൈറലായി.
കേരളം നേരിടുന്ന വലിയ പ്രതിസന്ധിയാണ് മാലിന്യങ്ങളെന്നും വേദിയിൽ ചൊല്ലിയ ശുചിത്വ പ്രതിജ്ഞ എല്ലാവരും പ്രവർത്തി പഥത്തിൽ എത്തിക്കണമെന്നും ലാൽ പറഞ്ഞു. ഗൃഹനാഥകളെ ശാക്തീകരിക്കുന്നതിലൂടെ കുടുംബം സാമ്പത്തികമായും സാമൂഹികമായും കൂടുതൽ ഉയർന്ന നിലവാരത്തിലേക്ക് മാറുമെന്നും മോഹൻലാൽ പറഞ്ഞു. ചെങ്ങന്നൂർ പെരുമയുടെ ഭാഗമായി പ്രഥമ ശ്രേഷ്ഠ ചെങ്ങന്നൂർ പുരസ്കാരം നടൻ മോഹൻലാലിന് മന്ത്രി സജി ചെറിയാൻ സമ്മാനിച്ചു. ചടങ്ങിൽ കൃഷി വകുപ്പ് മന്ത്രി പി പ്രസാദ് മോഹൻലാലിനെ പൊന്നാട അണിയിച്ച് ആദരിച്ചു.
