ബോളിവുഡ് നടൻ വരുൺ കുൽക്കർണി ഗുരുതരാവസ്ഥയിൽ ആശുപത്രിയിൽ. വൃക്കസംബന്ധമായ രോഗത്തെ തുടർന്നാണ് വരുണിനെ ആശുപത്രിയിൽ പ്രവേശിപ്പിച്ചത്. മുംബൈയിലെ സ്വകാര്യ ആശുപത്രിയിലാണ് ചികിത്സയിൽ കഴിയുന്നത്. ആരോഗ്യ പ്രശ്നങ്ങളെ തുടർന്ന് കുറച്ചുനാളുകളായി ചികിത്സയിൽ തുടരുകയാണ് വരുൺ. ഇതിനിടെ സാമ്പത്തിക സഹായം അഭ്യർത്ഥിച്ചുകൊണ്ട് താരത്തിന്റെ സുഹൃത്ത് റോഷൻ ഷെട്ടി പങ്കുവച്ച പോസ്റ്റ് സമൂഹമാദ്ധ്യമങ്ങളിൽ ശ്രദ്ധനേടുകയാണ്. ചികിത്സയിലുള്ള താരത്തിന്റെ ചിത്രവും സുഹൃത്ത് പങ്കുവച്ചു.
‘നടനും എന്റെ പ്രിയ സുഹൃത്തുമായ വരുൺ കുൽക്കർണി വൃക്കസംബന്ധമായ രോഗം ബാധിച്ച് അത്യാഹിത വിഭാഗത്തിൽ ചികിത്സയിലാണ്. അവന്റെ ചികിത്സാ ചെലവുകൾ വർദ്ധിച്ചുക്കുന്നു. ആഴ്ചയിൽ രണ്ട് മൂന്ന് തവണ ഡയാലിസിസ് ചെയ്യേണ്ട അവസ്ഥയാണ്. ദിവസേനയുള്ള മറ്റ് ചെലവുകളും ധാരാളമുണ്ട്. വരുണിന്റെ ചികിത്സാ ചെലവുകൾക്ക് സുമനസുകളുടെ സഹായം ആവശ്യമാണ്- സുഹൃത്ത് കുറിച്ചു.
വരുണിനെ വ്യക്തിപരമായി അറിയുന്നവർ സഹായിക്കാനുള്ള മനസ് കാണിക്കണമെന്നും വരുണിനെ തിരികെ കാെണ്ടുവരാൻ നമുക്ക് ഒരുമിച്ച് നിൽക്കാമെന്നും റോഷൻ ഷെട്ടി കുറിപ്പിൽ പറയുന്നു. രാജ്കുമാർ ഹിരാനി സംവിധാനം ചെയ്ത് 2023-ൽ റിലീസ് ചെയ്ത ചിത്രമായ ഡംകിയിൽ വരുൺ ഒരു ശ്രദ്ധേയ കഥാപാത്രം ചെയ്തിരുന്നു. വിക്കി കൗശൽ, തപ്സി പന്നു എന്നിവർക്കൊപ്പമാണ് വരുൺ കുൽക്കർണി അഭിനയിച്ചത്.
