വൈപ്പിൻ: വഖഫ് നിയമ ഭേദഗതി ബിൽ അവതരിപ്പിക്കുമ്പോൾ പാർലമെന്‍റിൽ അനുകൂല നിലപാട് സ്വീകരിക്കുമെന്ന് ഫ്രാൻസിസ് ജോർജ് എം.പി. നീതിക്കും ന്യായത്തിനുംവേണ്ടി ആരോടും സഹകരിക്കാൻ താനും തന്‍റെ പാർട്ടിയായ കേരള കോണ്‍ഗ്രസ് ജോസഫ് വിഭാഗവും തയാറാണെന്നുംഫ്രാന്‍സിസ് ജോര്‍ജ് പറഞ്ഞു.
കേരള കോണ്‍ഗ്രസ് ജോസഫ് വിഭാഗമിപ്പോൾ കേരളത്തിൽ ‘ഇണ്ടി’ സഖ്യത്തിന്റെ ഭാഗമാണ്.
ഒരു ജനപ്രതിനിധി എന്ന നിലയിലും ഒരു രാഷ്‌ട്രീ പാര്‍ട്ടി പ്രതിനിധി എന്ന നിലയിലും പുതിയ കേന്ദ്ര വഖ്ഫ് നിയമത്തോട് നൂറ് ശതമാനം ഞാന്‍ യോജിക്കുന്നു. എന്റെയും എന്റെ പാര്‍ട്ടിയുടെയും സുവ്യക്തമായ നിലപാട് അതാണ്. പാര്‍ലിമെന്റില്‍ ബില്‍ വരുമ്പോള്‍ ആ നിലപാട് ഞങ്ങള്‍ വ്യക്തമാക്കിയിരിക്കും. പിന്തുണച്ചിരിക്കുമെന്നും ഫ്രാന്‍സിസ് ജോര്‍ജ് ആണയിട്ട് പറഞ്ഞു.
നിലവിലുള്ള വഖഫ് നിയമത്തിലെ നിർദയമായ വകുപ്പുകളോട് മനഃസാക്ഷിയുള്ള ആർക്കും യോജിക്കാൻ കഴിയില്ല. കേന്ദ്ര സർക്കാർ സമ്മർദങ്ങൾക്ക് വഴങ്ങി ഈ ബിൽ അവതരണത്തിൽനിന്ന് പിന്നോട്ട് പോകരുതെന്നും എം.പി പറഞ്ഞു. മുനമ്പം ഭൂസമരത്തിന്റെ 101ാമത് ദിനത്തിൽ സമരപ്പന്തലിൽ എത്തിയതായിരുന്നു ഫ്രാൻസിസ് ജോർജ്. അസംബ്‌ളി ഓഫ് ക്രിസ്ത്യന്‍ ട്രസ്റ്റ് സര്‍വീസസിന്റെ നേതൃത്വത്തില്‍ ആരംഭിച്ച രാപകല്‍ സമരത്തിന്റെ സമാപന പ്രസംഗത്തിലാണ് ഫ്രാന്‍സിസ് ജോര്‍ജ് ഉറച്ച നിലപാടെടുത്തത്.
