പ്രയാഗ് രാജ്: രാജ്യത്ത് സനാതന ധർമ്മത്തിന്റെ സംരക്ഷണത്തിനായി സനാതന ബോർഡ് രൂപീകരിക്കണമെന്ന് കുംഭമേളയിൽ സംഘടിപ്പിച്ച സനാതന ധർമ്മ സൻസദ് ആവശ്യപ്പെട്ടു. ഇതിന്റെ കരട് രൂപവും ധർമ്മ സൻസദ് അംഗീകരിച്ചു. രാജ്യത്ത് ന്യൂനപക്ഷ സംരക്ഷണത്തിന്റെ പേരിൽ രൂപീകരിക്കപ്പെട്ട വഖ്ഫ് ബോർഡിന്റെ വ്യാപക അധിനിവേശം ചർച്ചയായ സാഹചര്യത്തിലാണ് സനാതന ധർമ്മ സംരക്ഷണത്തിനായി സനാതന ബോർഡിനായി ആവശ്യം ഉയരുന്നത്.
ഭാരതത്തിൽ വിപ്ലവകരമായ നിരവധി ആത്മീയ പരിവർത്തനങ്ങൾക്ക് വേദിയൊരുങ്ങിയ കുംഭമേളയിലാണ് സനാതന ബോർഡ് രൂപീകരണത്തിനായി ആഹ്വാനമുയർന്നതെന്നതും ശ്രദ്ധേയമാണ്. സാനതന ധർമ്മം നിലനിന്നെങ്കിൽ മാത്രമേ ലോകത്ത് എല്ലാ ജീവജാലങ്ങൾക്കും നിലനിൽപ്പുള്ളൂവെന്നും അതിനാൽ തന്നെ സനാതന ബോർഡിന്റെ രൂപീകരണം അനിവാര്യമാണെന്നും ധർമ്മ സൻസദിൽ ചൂണ്ടിക്കാട്ടി.
ഹൈന്ദവ ആത്മീയ ആചാര്യൻമാരും സന്യാസശ്രേഷ്ഠരുമാണ് സൻസദിൽ പങ്കെടുത്തത്. ആത്മീയനേതാവ് ദേവ്കി നന്ദൻ താക്കൂർജി മഹാരാജ് ആണ് ധർമ്മ സൻസദ് വിളിച്ചുചേർത്തത്. സനാതന ബോർഡിന്റെ അടിസ്ഥാന തത്വങ്ങൾ ഉൾക്കൊള്ളിച്ചുള്ള കരട് രൂപവും സമ്മേളനം മുന്നോട്ടുവെച്ചു. സനാതന ബോർഡ് രൂപീകരിക്കാനുള്ള ഉചിതമായ സമയമിതാണെന്നും അത് ഹിന്ദു സമൂഹത്തിന്റെ അവകാശമാണെന്നും സ്വാമി അശുതോഷാനന്ദ് ചൂണ്ടിക്കാട്ടി.
ഇന്ന് വഖ്ഫ് ബോർഡ് രാജ്യത്തെ മുഴുവൻ വിഴുങ്ങിയിരിക്കുകയാണ്. കുംഭമേള നടക്കുന്ന ഭൂമി പോലും അവരുടേതാണെന്നാണ് ചില വിഡ്ഢികൾ അവകാശപ്പെടുന്നത്. സനാതന ബോർഡ് രൂപീകരിക്കേണ്ടതിന്റെ ആവശ്യകതയാണ് ഇത് സൂചിപ്പിക്കുന്നതെന്ന് ധർമ്മ സൻസദിൽ പങ്കെടുത്ത സ്വാമി ചിൻമയാനന്ദ പറഞ്ഞു.
ഇന്ന് നമ്മൾ ഐക്യത്തോടെ നിന്ന് രാജ്യത്തെ സംരക്ഷിച്ചില്ലെങ്കിൽ വലിയ പ്രശ്നങ്ങൾക്ക് വഴിയൊരുക്കുമെന്നായിരുന്നു ശ്രീജി മഹാരാജിന്റെ മുന്നറിയിപ്പ്. നമ്മുടെ കുടുംബങ്ങൾക്ക് വേണ്ടി സനാതന സംസ്കൃതിയുടെ സംരക്ഷണത്തിനായാണ് സനാതന ബോർഡ് രൂപീകരണമെന്ന് ആവശ്യപ്പെടുന്നതെന്ന് അദ്ദേഹം പറഞ്ഞു. സനാതന ബോർഡിനായുള്ള ആവശ്യം വിപ്ലവകരമാണെന്നും ശ്രീജി മഹാരാജ് പറഞ്ഞു.
വിശ്വാസികൾക്ക് അവരുടെ ക്ഷേത്രങ്ങളുടെ നിയന്ത്രണം അവരുടെ കൈകളിൽ തന്നെ നിലനിർത്താൻ സനാതന ബോർഡിന്റെ രൂപീകരണം സഹായിക്കുമെന്ന് സ്വാമി വിദ്യാഭാസ്കർ ചൂണ്ടിക്കാട്ടി. സനാതന ബോർഡ് നമ്മുടെ ക്ഷേത്രങ്ങളെ തിരിച്ചുപിടിക്കാൻ സഹായിക്കും. ബോർഡിന്റെ രൂപീകരണം രാജ്യത്തിനും സാനതന ധർമ്മത്തിൽ വിശ്വസിക്കുന്ന ജനങ്ങൾക്കും ആവശ്യമാണെന്നും സ്വാമി വിദ്യാഭാസ്കർ കൂട്ടിച്ചേർത്തു.
പൂജയും പാരമ്പര്യവും സംസ്കാരവും ഗോമാതാവും എല്ലാം ഒരു കുടക്കീഴിൽ എത്തിച്ചാൽ എല്ലാത്തിനും സംരക്ഷണമൊരുക്കാൻ സാധിക്കുമെന്ന് ദേവ്കിനന്ദൻ താക്കൂർ പറഞ്ഞു. കുംഭമേളയിൽ എത്തിയ നിരവധി സന്യാസികളും മാഹാത്മാക്കളും സനാതന ലോകത്തിന് ശരിയായ ദിശ കാട്ടാൻ ഇത്തരമൊരു ബോർഡ് രൂപീകരിക്കേണ്ടതിന്റെ ആവശ്യകത ഉയർത്തിക്കാട്ടിയതായും അദ്ദേഹം പറഞ്ഞു. സനാതൻ ബോർഡിന്റെ കരട് രൂപം ധർമ്മ സൻസദിൽ എല്ലാ മതനേതാക്കളും അംഗീകരിച്ചതായും ദേവ്കി നന്ദൻ താക്കൂർ വ്യക്തമാക്കി.
