ദമാസ്കസ്: സിറിയൻ അൽ-ഖ്വയ്ദ എന്ന പേരിൽ അറിയപ്പെടുന്ന ഹുറാസ് അൽ-ദിനിന്റെ തലവനെ യുഎസ് സൈന്യം വകവരുത്തി. വടക്കുപടിഞ്ഞാറൻ സിറിയയിൽ നടത്തിയ വ്യോമാക്രമണത്തിലാണ് മുഹമ്മദ് യൂസഫ് സിയ തലായ കൊല്ലപ്പെട്ടതെന്ന് യുഎസ് സൈന്യം അറിയിച്ചു. ഫെബ്രുവരി 23 നാണ് സൈന്യം വ്യോമാക്രമണം നടത്തിയത്. മുഹമ്മദ് യൂസഫ് സിയ സഞ്ചരിച്ച കാറിന് നേരെ ആകാശത്തിൽ നിന്നും വെടിയുതിർക്കുകയായിരുന്നു. വിജനമായ സമതലത്തിലൂടെ ഓടിക്കൊണ്ടിരുന്ന കാറിന് നേരെ വ്യോമാക്രമണം നടത്തുന്നത് യുഎസ് സൈന്യം പങ്കുവെച്ച് ദൃശ്യങ്ങളിൽ കാണാം.
“ഫെബ്രുവരി 23 ന്, യുഎസ് സെൻട്രൽ കമാൻഡ് (CENTCOM) വടക്കുപടിഞ്ഞാറൻ സിറിയയിൽ നടത്തിയ വ്യോമാക്രമണത്തിൽ, അൽ-ഖ്വയ്ദ അനുബന്ധ സംഘടനയായ ഹുറാസ് അൽ-ദിൻ (HaD) നേതാവായ മുഹമ്മദ് യൂസഫ് സിയ തലായെ കൊലപ്പെടുത്തി. ഭീകരരെ തുടച്ചു നീക്കാനുള്ള സെൻട്രൽ കോമിന്റെ പ്രതിബദ്ധതയുടെ ഭാഗമാണ് വ്യോമാക്രമണം” യുഎസ് സെൻട്രൽ കമാൻഡ് എക്സിൽ പറഞ്ഞു.
ഫെബ്രുവരി 21 ന് നടത്തിയ മറ്റൊരു വ്യോമാക്രമണത്തിലൂടെ ഹുറാസ് അൽ-ദിനിന്റെ മുതിർന്ന നേതാവ് വസീം തഹ്സിൻ ബൈറഖ്ദാറിനെ യുഎസ് യുഎസ് സൈന്യം വധിച്ചിരുന്നു.
സിറിയൻ അൽ-ഖ്വയ്ദ എന്ന് വിളിക്കപ്പെടുന്ന ഭീകരസംഘടനയാണ് ഹുറാസ് അൽ-ദിൻ. 2018 ഫെബ്രുവരിയിലാണ് രൂപം കൊണ്ടത്. എന്നാൽ ഈ വർഷം ജനുവരിയിൽ ഭീകരരസംഘടന പിരിച്ചുവിട്ടുവെന്ന് പ്രഖ്യാപിച്ചതായി എഎഫ്പി റിപ്പോർട്ട് ചെയ്തിരുന്നു.
