ചെന്നൈ: ഇലക്ട്രിക് സ്കൂട്ടർ ചാർജ് ചെയ്യുന്നതിനിടെ തീപിടിച്ച് ഒൻപത് മാസം പ്രായമുള്ള കുഞ്ഞ് മരിച്ചു. ചെന്നൈ മധുരവോയൽ സ്വദേശി ഗൗതമിന്റെ മകൾ ഏഴിലരസി ആണ് മരിച്ചത്. ഞായറാഴ്ച പുലർച്ചെയാണ് അപകടം.
ഇലക്ട്രിക് സ്കൂട്ടർ ചാർജ് ചെയ്യാൻ ഇട്ടശേഷം വീടിന്റെ താഴത്തെ നിലയിലാണ് ഗൗതമും ഭാര്യയും ഒൻപത് മാസം പ്രായമുള്ള കുഞ്ഞും ഉറങ്ങാൻ കിടന്നത്. ചാർജിങ്ങിനിടെ ഇലക്ട്രിക് സ്കൂട്ടറിന് തീപിടിച്ച് താഴത്തെ നിലയിലെ മുറിയിലേക്കും തീ പടരുകയായിരുന്നു.
നല്ല ഉറക്കത്തിലായിരുന്ന മൂവരുടെയും ദേഹത്ത് തീപടർന്ന് പിടിച്ചു. ഗുരുതരമായി പൊള്ളലേറ്റ മൂവരെയും ഉടൻ ആശുപത്രിയിൽ പ്രവേശിപ്പിച്ചു. തീവ്രപരിചരണ വിഭാഗത്തിൽ ചികിത്സയിലിരിക്കെയാണ് കുഞ്ഞ് മരിച്ചത്. 50 ശതമാനം പൊള്ളലേറ്റ ഗൗതമും ഭാര്യയും തീവ്രപരിചരണ വിഭാഗത്തിൽ ചികിത്സയിൽ തുടരുകയാണ്. സംഭവത്തിൽ മധുരവോയൽ പൊലീസ് കേസെടുത്ത് അന്വേഷണം ആരംഭിച്ചു.
