ന്യൂഡല്‍ഹി: വഖ്ഫ് നിയമ ഭേദഗതിബില്ല് ലോക്‌സഭയില്‍ വോട്ടെടുപ്പിലൂടെ പാസായി. ലോക്‌സഭാ സ്പീക്കര്‍ ഓം ബിര്‍ളയാണ്ബില് പാസ്സായി എന്ന പ്രഖ്യാപനം നടത്തിയത്. 288 പേരുടെ പിന്തുണ നേടിയാണ് ബില്ല് പാസായത്. 232 പേരാണ് ബില്ലിനെ എതിര്‍ത്തു വോട്ടു ചെയ്തത്. 12 മണിക്കൂര്‍ നീണ്ട ചര്‍ച്ചയ്‌ക്കു ശേഷം ബില്ലിന്മേലുള്ള വോട്ടെടുപ്പ് പ്രക്രിയ രണ്ട് മണിക്കൂര്‍ നീണ്ടു. ഇതിനു ശേഷമാണ് വഖ്ഫ് ഭേദഗതിബില്ല് പാസായത്.
നാടകീയരംഗങ്ങള്‍ക്കു സാക്ഷ്യം വഹിച്ചു കൊണ്ട് ബുധനാഴ്ച ഉച്ചയ്‌ക്ക് 12 മണിക്കാണ് വഖ്ഫ് ഭേദഗതിബില്ലില്‍ ലോക്‌സഭയില്‍ ചര്‍ച്ച തുടങ്ങിയത്. ഇത് രാത്രി 12 മണിവരെ നീണ്ടു. ചര്‍ച്ച പൂര്‍ത്തിയാക്കിയശേഷമാണ് ബില്ലില്‍ വോട്ടെടുപ്പ് നടന്നത്. കേരളത്തില്‍നിന്നുള്ള പ്രതിപക്ഷ എംപിമാരായ എന്‍.കെ. പ്രേമചന്ദ്രന്‍, കെ.സി. വേണുഗോപാല്‍ എന്നിവരുടെ ഭേഗദതി നിര്‍ദേശങ്ങള്‍ ശബ്ദവോട്ടോടെ തള്ളി . ഇ.ടി. മുഹമ്മദ് ബഷീര്‍, കെ. രാധാകൃഷ്ണന്‍ എന്നിവരുടെ ഭേദഗതികളും തള്ളി.
