തിരുവനന്തപുരം: ക്ഷേത്രോത്സവത്തിൽ വിപ്ലവഗാനം പാടിയ സംഭവത്തിൽ ഗസൽ ഗായകൻ അലോഷി ആദത്തിനെതിരെ നൽകിയ പരാതിയിൽ കേസെടുക്കാതെ പൊലീസ്. ആറ്റിങ്ങൽ അവനവഞ്ചേരി ഇണ്ടിളയപ്പൻ ക്ഷേത്രത്തിലാണ് അലോഷി വീണ്ടും വിപ്ലവഗാനം പാടിയത്. സംഭവത്തിൽ ഒരു സംഘം ഭക്തർ ആറ്റിങ്ങൽ പൊലീസിൽ പരാതി നൽകിയിരുന്നു. വിപ്ലവ ഗാനത്തിൽ ബി ജെ പിയും കോൺഗ്രസും പരാതിയുമായി പോലീസിനെ സമീപിച്ചിരുന്നു. കഴിഞ്ഞ ഏഴിനായിരുന്നു സംഭവം. എന്നാൽ സംഭവത്തിൽ കേസെടുക്കാനാകില്ലെന്ന് ആറ്റിങ്ങൽ പോലീസ് വ്യക്തമാക്കിയതായി റിപ്പോർട്ടുകൾ സൂചിപ്പിക്കുന്നു. പൊലീസിന്റെ ഈ നിലപാട് നിയമത്തോടുള്ള വെല്ലുവിളിയെന്ന് ബിജെപി ആരോപിച്ചു.
കൊല്ലം കടയ്ക്കൽ ക്ഷേത്രത്തിൽ വിപ്ലവഗാനം ആലപിച്ചതിന് അലോഷിക്കെതിരെ കേസെടുത്തിരുന്നു. ഹൈക്കോടതിയുടെ നിർദേശപ്രകാരമാണ് കേസെടുത്തത്. വിമർശനങ്ങൾ കെട്ടണയുന്നതിന് മുമ്പാണ് വീണ്ടും അലോഷിയുടെ വിപ്ലവഗാനം.
കടയ്ക്കൽ തിരുവാതിരയുടെ ഭാഗമായി നടന്ന പരിപാടിയിലാണ് അലോഷി വിപ്ലവഗാനം ആലപിച്ചത്. എന്നാൽ കാണികൾ പറഞ്ഞതിനാലാണ് താൻ ഗാനം പാടിയതെന്ന് പറഞ്ഞ് അലോഷി തടിയൂരാൻ ശ്രമിച്ചെങ്കിലും ഹൈക്കോടതി വെറുതെവിട്ടില്ല. ഉത്സവം കൂടാനാണ് ഭക്തർ ക്ഷേത്രത്തിൽ എത്തുന്നതെന്നും ഇത്തരം പ്രവർത്തികൾ അനുവദിക്കില്ലെന്നും ഹൈക്കോടതി വിമർശിച്ചു.
