തിരുവനന്തപുരം: ഡ്രിൽ പിരീഡ് തരുന്നില്ലെന്ന കുട്ടികളുടെ സ്ഥിരം പരാതിക്ക് പരിഹാരമാകുന്നു. സ്കൂളുകളിൽ കായിക ഇനങ്ങൾക്ക് വേണ്ടി മാറ്റിവച്ച പിരീഡിൽ മറ്റ് വിഷയങ്ങൾ പഠിപ്പിക്കുന്നത് വിലക്കി. ഇത് സംബന്ധിച്ച കർശന നിർദ്ദേശം സ്കൂളുകൾക്ക് നൽകിയിട്ടുണ്ടെന്ന് വിദ്യാഭ്യാസ മന്ത്രി വി. ശിവൻകുട്ടി പറഞ്ഞു.
കുട്ടികളുടെ ശാരീര മാനസിക ആരോഗ്യം പരിപോഷിപ്പിക്കുന്നതിന്റെ ഭാഗമായി സ്കൂളുകളിൽ അടുത്ത അദ്ധ്യായന വർഷം മുതൽ സൂംബാ ഡാൻസ് പരിശീലനം നൽകുമെന്നും മന്ത്രി പറഞ്ഞു. ഇതിന്റെ ഔദ്യോഗിക ഉദ്ഘാടനം ഏപ്രിൽ 30ന് മുഖ്യമന്ത്രി പിണറായി വിജയൻ നിർവഹിക്കും.
ചടങ്ങിന്റെ ഭാഗമായി ചന്ദ്രശേഖരൻ നായർ സ്റ്റേഡിയത്തിൽ തിരുവനന്തപുരത്തെ 15 സ്കൂളുകളിൽ നിന്നായി ആയിരത്തിയഞ്ഞൂറോളം വിദ്യാർഥികൾ സൂംബാ അവതരിപ്പിക്കും. സർക്കാരിന്റെ ലഹരി വിരുദ്ധ ക്യാമ്പയിന്റെ ഭാഗമായി കൂടിയാണ് വിദ്യാർത്ഥികളെ സൂംബാ ഡാൻസ് പരിശീലിപ്പിക്കുന്നത്. സംസ്ഥാനത്തെ എല്ലാം സ്‌കൂളുകളിലും ഇതിനുള്ള ക്ലാസുകൾ ഏർപ്പെടുത്തും. സൂബയ്‌ക്ക് പുറമേ യോഗ, കരാട്ടെ ഉൾപ്പെടെ കുട്ടികൾക്കു താല്പര്യമുള്ള ഇനങ്ങൾ പഠിപ്പിക്കാനും തീരുമാനിച്ചിട്ടുണ്ട്.
