കൊച്ചി: തപസ്യ കലാസാഹിത്യവേദിയുടെ നേതൃത്വത്തിൽ തപസ്യയുടെ മുൻ സംസ്ഥാന അധ്യക്ഷൻ മഹാകവി എസ്. രമേശ് നായർ സ്മൃതി ദിനത്തിൽ ‘രമ്യസന്ധ്യ’ എന്ന പേരിൽ അനുസ്മരണവും പുസ്തക പ്രകാശനവും വ്യാഴാഴ്ച വൈകിട്ട് 5:30ന് ഇടപ്പള്ളി ചങ്ങമ്പുഴ പാർക്കിൽ നടക്കും.
വെണ്ണല മോഹൻ അധ്യക്ഷത വഹിക്കുന്ന ചടങ്ങിൽ തപസ്യ സംസ്ഥാന വർക്കിംഗ് പ്രസിഡന്റ് പ്രൊഫ. പി. ജി. ഹരിദാസ് അനുസ്മരണഭാഷണം നടത്തും. എസ്. രമേശൻ നായർ രചിച്ച “സനാതന സംസ്കൃതിയുടെ സർഗസഞ്ചാരങ്ങൾ” എന്ന പുസ്തകം പ്രശസ്ത സിനിമാ സംവിധായകൻ വിനയൻ പ്രകാശനം ചെയ്യും. കുരുക്ഷേത്ര പ്രകാശൻ ചീഫ് എഡിറ്റർ ജി. അമൃതരാജ് പുസ്തകാവലോകനം നടത്തും.
ചടങ്ങിൽ രമേശൻ നായരുടെ സഹധർമ്മിണി പി. രമ ഉൾപ്പെടെ പ്രശസ്ത സാഹിത്യ പ്രവർത്തകരും, എഴുത്തുകാരും, കലാകാരന്മാരും പങ്കെടുക്കും. ആർ എൽ വി ശ്രീനാഥും സംഘവും അവതരിപ്പിക്കുന്ന രമേശൻ നായർ രചിച്ച കവിതകളും ഭക്തിഗാനങ്ങളും സിനിമാഗാനങ്ങളും കോർത്തിണക്കി “രമ്യഗീതങ്ങൾ” എന്ന പരിപാടിയും നടക്കും.
