സ്വർണ വിലയിൽ കുതിപ്പ് തുടരുന്നു. ഇതാദ്യമായി ഒരു പവൻ സ്വർണത്തിന്റെ വില 80,000 കടന്നു. 80,880 രൂപയാണ് സംസ്ഥാനത്ത് ഒരു പവൻ സ്വർണത്തിന്റെ വില. ഒരൊറ്റ ദിവസംകൊണ്ട് 1,000 രൂപയാണ് കൂടിയത്. ഗ്രാമിന്റെ വിലയാകട്ടെ 10,000 കടന്ന് 10,110 രൂപയായി. അതായത് പണിക്കൂലി, നികുതി, ഹാൾമാർക്കിംഗ് ചാർജുകൾ ഉൾപ്പെടെ കുറഞ്ഞത് 87,500 രൂപയെങ്കിലും ഒരു പവൻ സ്വർണാഭരണത്തിന് നൽകേണ്ടി വരും.
ഭാരം കുറഞ്ഞ കുറഞ്ഞ സ്വർണാഭരണങ്ങൾ നിർമിക്കാൻ ഉപയോഗിക്കുന്ന 18 കാരറ്റ് സ്വർണം ഗ്രാമിന് 100 രൂപ വർധിച്ച് 8,300 രൂപയിലെത്തി. 14 കാരറ്റ് സ്വർണം ഗ്രാമിന് 6,465 രൂപയിലും 9 കാരറ്റ് സ്വർണം ഗ്രാമിന് 4,165 രൂപയിലുമാണ് ഇന്നത്തെ വ്യാപാരം. വെള്ളി വിലയിൽ മാറ്റമില്ല. ഗ്രാമിന് 133 രൂപ.
2005ൽ 4,500 രൂപയായിരുന്നു കേരളത്തിൽ ഒരു പവൻ സ്വർണത്തിന്റെ വില. 2010ൽ ഏകദേശം ഇത് 15,000 രൂപയായി. 2015 ൽ ഇത് 19,000 കടന്നു. 2020 സെപ്തംബറിൽ 37,000 വരെ സ്വർണ്ണ വില എത്തി. അതേ സ്വർണമാണ് 2025ൽ 80,000 കടന്നത്.
അമേരിക്കൻ ഡോളറിന്റെ വിനിമയ നിരക്ക് കുറഞ്ഞതും ഫെഡ് പലിശ നിരക്ക് കുറക്കുമെന്ന പ്രതീക്ഷ ശക്തമായതുമാണ് സ്വർണ വില കുതിക്കാൻ ഇടയാക്കിയത്. ഡോളർ സൂചിക 0.10 ശതമാനം ഇടിഞ്ഞത് മറ്റ് കറൻസികളിൽ സ്വർണം വാങ്ങൽ എളുപ്പമാക്കി
ഓൺലൈൻ വ്യാപാരികൾ സ്വർണ നിക്ഷേപം വിറ്റഴിക്കാതെ കൈവശം വെച്ചിരിക്കുന്നതും വില വർദ്ധനവിന് കാരണമാകുന്നതായി കേരളത്തിലെ ജ്വല്ലറിയുടമകൾ പറയുന്നു.
