പത്തനംതിട്ട: ശബരിമലയിലെ ദ്വാരകപാലകശിൽപങ്ങളിൽ നിന്നും വേർതിരിച്ചെടുത്ത സ്വർണം ബെല്ലാരിയിൽ നിന്ന് കണ്ടെത്തി. ഉണ്ണികൃഷ്ണൻ പോറ്റി നൽകിയ മൊഴിയുടെ അടിസ്ഥാനത്തിൽ നടത്തിയ അന്വേഷണത്തിൽ വ്യാപാരിയായ ഗോവർദ്ധന്റെ ജ്വല്ലറിയിൽ നിന്നാണ് സ്വർണം കണ്ടെത്തിയത്. സ്വർണക്കട്ടികളാണ് കണ്ടെടുത്തിരിക്കുന്നത്. 476 ഗ്രാം സ്വർണം തനിക്ക് നൽകിയെന്നാണ് ഗോവർദ്ധൻ നൽകിയ മൊഴി.
കഴിഞ്ഞ ദിവസമാണ് ഉണ്ണികൃഷ്ണൻ പോറ്റിയെ ചോദ്യം ചെയ്തതിൽ നിന്ന് സ്വർണം ബെല്ലാരിയിൽ ഉണ്ടെന്ന് വ്യക്തമായത്. തുടർന്ന് അന്വേഷണസംഘം ബെല്ലാരിയിലേക്ക് എത്തുകയും ഗോവർദ്ധന്റെ ജ്വല്ലറിയിൽ പരിശോധന നടത്തുകയുമായിരുന്നു. ഉണ്ണി കൃഷ്ണൻ പോറ്റി കൈമാറിയ മുഴുവൻ സ്വർണവും കണ്ടെത്തിയോ എന്ന കാര്യം വ്യക്തമല്ല.
സ്വർണം ഗോവർദ്ധന്റെ കൈവശമുണ്ടെന്ന വിവരത്തിന്റെ അടിസ്ഥാനത്തിൽ ബെംഗളൂരുവിലും ബെല്ലാരിയിലുമായാണ് തെളിവെടുപ്പ് നടത്തിയത്. സ്വർണം കണ്ടെത്തിയതോടെ ഗോവർദ്ധനെ സാക്ഷിയാക്കാനാണ് അന്വേഷണസംഘത്തിന്റെ തീരുമാനം.
ചെന്നൈയിലെ സ്മാർട്ട് ക്രിയേഷൻസിൽ വച്ചാണ് പാളികളിൽ നിന്നും സ്വർണം വേർതിരിച്ചെടുത്തത്. ഇത് പിന്നീട് ഗോവർദ്ധന് നൽകുകയായിരുന്നുവെന്നാണ് കണ്ടെത്തൽ. ഉണ്ണി കൃഷ്ണൻ പോറ്റി നൽകിയ മൊഴിയുടെ അടിസ്ഥാനത്തിൽ ഗോവർദ്ധനെ കസ്റ്റഡിയിലെടുത്താണ് ക്രൈംബ്രാഞ്ച് ചോദ്യം ചെയ്തത്.
