ന്യൂഡൽഹി: ദുബായിൽ നടന്ന എയർഷോയ്ക്കിടെ തേജസ് യുദ്ധവിമാനം തകർന്ന് വീരമൃത്യു വരിച്ച വിംഗ് കമാൻഡർ നമാൻഷ് സിയാലിന് അന്ത്യാഞ്ജലി അർപ്പിച്ച് വ്യോമസേന. അചഞ്ചലമായ മനോബലവും ഉത്തരവാദിത്തബോധവുമുള്ള വ്യക്തിയാണ് നമാൻഷ് സിയാലെന്ന് വ്യോമസേന പുറത്തിറക്കിയ പ്രസ്താവനയിൽ പറയുന്നു. യുഎഇ ഉദ്യോഗസ്ഥർ, സഹപ്രവർത്തകർ, ഇന്ത്യൻ എംബസി ഉദ്യോഗസ്ഥർ എന്നിവർ ചേർന്ന് അദ്ദേഹത്തിന് യാത്രയയ്പ്പ് നൽകി.
വിംഗ് കമാൻഡർ നമാൻഷ് സിയാലിന്റെ സേവനം എന്നെന്നും ഓർമിക്കപ്പെടുമെന്നും അദ്ദേഹത്തിന്റെ ധൈര്യത്തെയും അർപ്പണബോധത്തെയും ആദരിക്കുന്നുവെന്നും വ്യോമസേന വ്യക്തമാക്കി. പ്രതിരോധമന്ത്രി രാജ്നാഥ് സിംഗ്, സൈനിക മേധാവി അനിൽ ചൗഹാൻ എന്നിവർ അന്ത്യാഞ്ജലി അർപ്പിച്ചു.
ദുബായ് വേൾഡ് സെൻട്രലിലെ അൽ മുക്തൂം അന്താരാഷ്ട്ര വിമാനത്താവളത്തിന് മുകളിൽ പറക്കുന്നതിനിടെയാണ് തേജസ് യുദ്ധവിമാനം തകർന്നുവീണത്. യുദ്ധവിമാനത്തിന്റെ പ്രകടനത്തിനിടെ താഴേക്ക് വീണ് പൊട്ടിത്തെറിക്കുകയായിരുന്നു. ഹിമാചൽപ്രദേശ് സ്വദേശിയാണ് വീരമൃത്യു വരിച്ച വിംഗ് കമാൻഡർ നമാൻഷ് സിയാൽ. അപകടകാരണം അന്വേഷിച്ചുവരികയാണ്.
