വയനാട്: കമ്പളക്കാട് കോഴി കൃഷിയിടത്തിൽ കയറിയെന്ന് ആരോപിച്ച് വൃദ്ധദമ്പതികൾക്ക് അയൽവാസിയുടെ ക്രൂരമർദനം. ഗുരുതരമായ പരിക്കേറ്റ കണിയാമ്പറ്റ സ്വദേശികളായ ലാൻസി തോമസ്, അമ്മിണി എന്നിവർ ചികിത്സയിലാണ്. അയൽവാസിയായ തോമസ് വൈദ്യർക്കെതിരെ കമ്പളക്കാട് പൊലീസ് വിവിധ വകുപ്പുകൾ പ്രകാരം കേസെടുത്തു.
തിങ്കളാഴ്ച വൈകിട്ടാണ് സംഭവം. പച്ചക്കറി കൃഷിയിടത്തിൽ കോഴി കയറിയെന്ന് പറഞ്ഞായിരുന്നു ആക്രമണം. ഇരുമ്പുവടി കൊണ്ടുള്ള മർദ്ദനത്തിൽ ലാൻസി തോമസിന്റെ ഇരുകൈക്കും പരിക്കേറ്റു.അമ്മിണിയുടെ വലതു കൈക്കാണ് പരിക്ക്.
മുൻപും ഇരു വീട്ടുകാരും തമ്മിൽ തർക്കമുണ്ടായിരുന്നു. നിസ്സാര കാര്യങ്ങൾക്ക് പോലും തോമസ് വൈദ്യർ ഉപദ്രവിക്കാറുണ്ടെന്ന് ദമ്പതികൾ പൊലീസിന് മൊഴി നൽകി. ഇരുവരും ഇപ്പോൾ മാനന്തവാടി മെഡിക്കൽ കോളജിൽ ചികിത്സയിലാണ്.
