വിവിധ ജില്ലകളില്‍ വിദ്യാഭ്യാസ സ്ഥാപനങ്ങള്‍ക്ക് അവധി

തദ്ദേശ വോട്ടെടുപ്പിനോട് അനുബന്ധിച്ച് കേരളത്തില്‍ വിവിധ ജില്ലകളില്‍ ഈയാഴ്ച വിദ്യാഭ്യാസ സ്ഥാപനങ്ങള്‍ക്ക് അവധി പ്രഖ്യാപിച്ചിട്ടുണ്ട്. വോട്ടെടുപ്പ് നടക്കുന്ന ഡിസംബര്‍ 9, 11 തീയതികളില്‍ അതത് ജില്ലകളില്‍ അവധി നേരത്തെ തന്നെ പ്രഖ്യാപിച്ചിട്ടുണ്ട്. ഡിസംബര്‍ ഒമ്പതിന്‌ തിരുവനന്തപുരം, കൊല്ലം, പത്തനംതിട്ട, കോട്ടയം, ഇടുക്കി, ആലപ്പുഴ, എറണാകുളം ജില്ലകളിലും, 11ന് തൃശ്ശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിലുമാണ് അവധി പ്രഖ്യാപിച്ചത്. ഇതിന് പുറമെയാണ് വിവിധ ജില്ലകളില്‍ മറ്റ് തീയതികളിലും അവധി പ്രഖ്യാപിച്ചത്.

തിരുവനന്തപുരം ജില്ലയിൽ പോളിംഗ് വിതരണ- സ്വീകരണ കേന്ദ്രങ്ങളായ സ്കൂളുകൾക്ക് തിങ്കളാഴ്ച അവധി. പോളിംഗ് സ്റ്റേഷനുകൾ, വിതരണ-സ്വീകരണ കേന്ദ്രങ്ങൾ, വോട്ടെണ്ണൽ കേന്ദ്രങ്ങൾ എന്നിവിടങ്ങളായി പ്രവർത്തിക്കുന്ന സ്ഥാപനങ്ങൾക്ക് ഡിസംബർ 8, 13 തീയതികളിൽ അവധിയായിരിക്കും.
തദ്ദേശ തെരഞ്ഞെടുപ്പിനോട് അനുബന്ധിച്ച് പോളിംഗ് സ്റ്റേഷനുകളായും വിതരണ സ്വീകരണ കേന്ദ്രങ്ങളായും പ്രവർത്തിക്കുന്ന വിദ്യാഭ്യാസ സ്ഥാപനങ്ങൾ ഉൾപ്പെടെയുള്ള സ്ഥാപനങ്ങൾക്ക് 8.12.2025 തിരഞ്ഞെടുപ്പ് കമ്മീഷന്റെ നിർദ്ദേശ പ്രകാരം ജില്ലാ കളക്ടർ അനു കുമാരി അവധി പ്രഖ്യാപിച്ചു. വിതരണ സ്വീകരണ കേന്ദ്രമായ മാർ ഇവാനിയോസ് വിദ്യാ നഗറിലെ എല്ലാ സ്ഥാപന ങ്ങൾക്കും അവധി ബാധകമായിരിക്കും.

എന്നാൽ ഇവിടെ മുൻകൂട്ടി നിശ്ചയിച്ച പരീക്ഷകൾക്ക് അവധി ബാധകമായിരിക്കില്ലെന്നും കളക്ടർ അറിയിച്ചു. വോട്ടെണ്ണൽ കേന്ദ്രങ്ങളായി പ്രവർത്തിക്കുന്ന വിദ്യാഭ്യാസ സ്ഥാപനങ്ങൾ ഉൾപ്പെടെയുള്ള സ്ഥാപനങ്ങൾക്ക് വോട്ടെണ്ണൽ ദിനമായ ഡിസംബർ 13 ന് അവധി ആയിരിക്കുമെന്നും കളക്ടർ അറിയിച്ചു. വോട്ടെടുപ്പ് ദിനമായ 9.12.2025 ജില്ലയിൽ പൊതു അവധി പ്രഖ്യാപിച്ചിട്ടുണ്ട്.

ആലപ്പുഴ
ആലപ്പുഴ ജില്ലയില്‍ തിങ്കളാഴ്ച (ഡിസംബര്‍ എട്ടിന്‌ ഹയർ സെക്കണ്ടറി വരെയുള്ള എല്ലാ വിദ്യാഭ്യാസ സ്ഥാപനങ്ങൾക്കും കളക്ടര്‍ അവധി പ്രഖ്യാപിച്ചു. ഹയർ സെക്കണ്ടറി വരെയുള്ള എല്ലാ വിദ്യാഭ്യാസ സ്ഥാപനങ്ങൾക്കും, ഡിസ്ട്രിബ്യൂഷൻ സെൻറർ/കളക്ഷൻ സെന്റർ/ സ്‌ട്രോംഗ്‌ റും എന്നിവ സ്ഥിതി ചെയ്യുന്ന കോളേജുകൾക്കും തിങ്കളാഴ്ച അവധിയായിരിക്കും. ഒമ്പതിന് പൊതു അവധിയുമുണ്ട്.

കോട്ടയം
കോട്ടയം ജില്ലയില്‍ തിരഞ്ഞെടുപ്പ്‌ സാമഗ്രികളുടെ വിതരണ, സ്വീകരണ കേന്ദ്രങ്ങളായും പോളിംഗ് ബൂത്തുകളായും പ്രവര്‍ത്തിക്കുന്ന സ്ഥാപനങ്ങള്‍ക്ക് ജില്ലാ ഇലക്ഷന്‍ ഓഫീസര്‍ കൂടിയായ ജില്ലാ കളക്ടര്‍ ചേതന്‍ കുമാര്‍ മീണ ഡിസംബര്‍ 8,9 തീയതികളില്‍ അവധി പ്രഖ്യാപിച്ചു.

ഇടുക്കി
ഇടുക്കി ജില്ലയിലെ പോളിംഗ് സ്റ്റേഷനുകൾ, സ്വീകരണ, വിതരണ കേന്ദ്രങ്ങളായി പ്രവർത്തിക്കുന്ന സ്കൂളുകൾ, കോളേജുകൾ അങ്കണവാടികൾ, മദ്രസകൾ, ഉൾപ്പെടെയുള്ള വിദ്യാഭ്യാസ സ്ഥാപനങ്ങൾക്ക് ഡിസംബര്‍ എട്ടിന്‌ ജില്ലാ കളക്ടർ ഡോ. ദിനേശൻ ചെറുവാട്ട് അവധി പ്രഖ്യാപിച്ചു. ഡിസംബർ 9 ന് ജില്ലയിൽ പൊതു അവധിയാണ്. കൗണ്ടിങ് സെന്ററായി പ്രവർത്തിക്കുന്ന വിദ്യാഭ്യാസ സ്ഥാപനങ്ങൾക്ക് ഡിസംബർ 13നും അവധിയുണ്ടെന്ന് കളക്ടര്‍ വ്യക്തമാക്കി.

എറണാകുളം
എറണാകുളം ജില്ലയില്‍ തിരഞ്ഞെടുപ്പ് ഡ്യൂട്ടിക്കുള്ള പൊലീസുകാരുടെ ക്യാമ്പായി പ്രവര്‍ത്തിക്കുന്ന പുല്ലേപ്പടി സെൻ്റ് അഗസ്റ്റിൻ പബ്ലിക് സ്കൂളിന് ഡിസംബർ 8 ന് ജില്ലാ തിരഞ്ഞെടുപ്പ് ഓഫീസർ കൂടിയായ ജില്ലാ കളക്ടർ ജി. പ്രിയങ്ക അവധി പ്രഖ്യാപിച്ചു.

തൃശൂര്‍
തൃശൂര്‍ ജില്ലയില്‍ തിരഞ്ഞെടുപ്പ്‌ സാമഗ്രികളുടെ സ്വീകരണ-വിതരണ കേന്ദ്രങ്ങളായും പോളിംഗ് കേന്ദ്രങ്ങളായും പ്രവര്‍ത്തിക്കുന്ന വിദ്യാഭ്യാസ സ്ഥാപനങ്ങള്‍ക്ക് 10 നും വോട്ടെണ്ണല്‍ കേന്ദ്രങ്ങളായ വിദ്യാഭ്യാസ സ്ഥാപനങ്ങള്‍ക്ക് ഡിസംബര്‍ 12 നും ജില്ലാ തിരഞ്ഞെടുപ്പ് ഉദ്യോഗസ്ഥനും ജില്ലാ കളക്ടറുമായ അര്‍ജുന്‍ പാണ്ഡ്യന്‍ അവധി പ്രഖ്യാപിച്ചു.

പാലക്കാട്‌
തിരഞ്ഞെടുപ്പ്‌ സാമഗ്രികളുടെ സ്വീകരണ വിതരണ കേന്ദ്രങ്ങളായി നിശ്ചയിച്ചിരിക്കുന്ന പാലക്കാട് ജില്ലയിലെ സ്ഥാപനങ്ങള്‍ക്ക് ഡിസംബര്‍ ഒന്‍പത് മുതല്‍ 12 വരെ ജില്ലാ തിരഞ്ഞെടുപ്പ് ഉദ്യോഗസ്ഥയായ ജില്ലാ കളക്ടര്‍ എം എസ് മാധവിക്കുട്ടി അവധി പ്രഖ്യാപിച്ചു. നിര്‍ദ്ദിഷ്ട പോളിങ് സ്റ്റേഷനുകളായി പ്രഖ്യാപിച്ചിട്ടുള്ള സ്ഥാപനങ്ങള്‍ക്ക് വോട്ടെടുപ്പ് ദിവസത്തിന് പുറമെ ഡിസംബര്‍ പത്തിനും അവധിയായിരിക്കും. ഡിസംബര്‍ 11ന് ജില്ലയില്‍ പൊതുഅവധിയാണ്.

കണ്ണൂര്‍
കണ്ണൂര്‍ ജില്ലയില്‍ പോളിംഗ് സ്‌റ്റേഷനുകളായി പ്രവര്‍ത്തിക്കുന്ന സ്ഥാപനങ്ങള്‍ക്ക് ഡിസംബര്‍ 10, 11 തീയതികളില്‍ ജില്ലാ തെരഞ്ഞെടുപ്പ് ഓഫീസറായ ജില്ലാ കലക്ടർ അരുൺ കെ. വിജയൻ അവധി പ്രഖ്യാപിച്ചു. തിരഞ്ഞെടുപ്പ്‌ സാമഗ്രികളുടെ സ്വീകരണ വിതരണ കേന്ദ്രങ്ങളായും, വോട്ടെണ്ണൽ കേന്ദ്രങ്ങളാളായും പ്രവർത്തിക്കുന്ന സ്ഥാപനങ്ങൾക്ക് ഡിസംബർ 10, 11, 13 തീയതികളിലും അവധിയായിരിക്കും.

കാസര്‍കോട്:
തദ്ദേശ തെരഞ്ഞെടുപ്പിന്റെ ഭാഗമായി സ്വീകരണ വിതരണ കേന്ദ്രങ്ങൾ പ്രവർത്തിക്കുന്ന സ്ട്രോങ് റൂമുകൾ സജ്ജീകരിച്ച വിദ്യാഭ്യാസ സ്ഥാപനങ്ങൾക്ക് ഇന്ന്‌ കലക്ടർ അവധി പ്രഖ്യാപിച്ചു.
അവധി നല്‍കിയ വിദ്യാഭ്യാസ സ്ഥാപനങ്ങൾ
മഞ്ചേശ്വരം ബ്ലോക്ക്: കുമ്പള ജിഎച്ച്എസ്എസ്,
കാസര്‍കോട് ബ്ലോക്ക്: കാസറഗോഡ് ഗവ. കോളേജ്,
കാറഡുക്ക ബ്ലോക്ക്: ബോവിക്കാനം ബിആർഎച്ച്എസ്എസ്‌,
കാഞ്ഞങ്ങാട് ബ്ലോക്ക്: കാഞ്ഞങ്ങാട് ദുർഗ എച്ച്എസ്എസ്,
നീലേശ്വരം നഗരസഭ: നീലേശ്വരം രാജാസ് എച്ച്എസ്എസ്,
പരപ്പ ബ്ലോക്ക്: പരപ്പ -ജിഎച്ച്എസ്എസ്,
നീലേശ്വരം ബ്ലോക്ക്: പടന്നക്കാട് – നെഹ്‌റു കോളേജ്,
കാഞ്ഞങ്ങാട് നഗരസഭ: ഹൊസ്ദുർഗ് – ജിഎച്ച്എസ്എസ്എസ്.

മറ്റെല്ലാ വിദ്യാഭ്യാസ സ്ഥാപനങ്ങൾക്കും പതിവു പോലെ പ്രവർത്തി ദിവസമായിരിക്കും എന്നും ജില്ലാ കളക്ടർ അറിയിപ്പിൽ വ്യക്തമാക്കി.

അതത് ജില്ലകളിലെ കളക്ടര്‍മാര്‍ പുറത്തുവിട്ട അവധി അറിയിപ്പുകളാണ് ഇവിടെ നല്‍കിയിരിക്കുന്നത്. പുതിയതായി മറ്റ് എവിടെയെങ്കിലും അവധി പ്രഖ്യാപിച്ചാല്‍ അത് അറിയാന്‍ കളക്ടര്‍മാരുടെയോ, ജില്ലാ ഇന്‍ഫര്‍മേഷന്റെയോ ഔദ്യോഗിക പേജുകള്‍ സന്ദര്‍ശിക്കുകയോ, മാധ്യമവാര്‍ത്തകള്‍ ശ്രദ്ധിക്കുകയോ ചെയ്യുക.