ന്യൂഡല്ഹി: കെടിയു-ഡിജിറ്റല് സര്വകലാശാലയുടെ വൈസ് ചാന്സലര്മാരുടെ നിയമനത്തില് വേറിട്ട നീക്കവുമായി സുപ്രീം കോടതി. സ്ഥിരം വിസിമാരുടെ നിയമനം സുപ്രീം കോടതി നേരിട്ട് നടത്തുമെന്നാണ് ഇപ്പോൾ വ്യക്തമാക്കിയിരിക്കുന്നത്. അടുത്ത ബുധനാഴ്ചയ്ക്കുള്ളില് ഓരോ പേരുകള് വീതം നല്കാന്സുധാന്ശു ധൂലിയ കമ്മിറ്റിയോട് സുപ്രീം കോടതി നിര്ദേശിച്ചു.
ഒരു പേരിലേക്ക് എത്താന് സാധ്യമായതെല്ലാം ചെയ്തെന്നും എന്നിട്ടും മുഖ്യമന്ത്രിയും ഗവര്ണറും തമ്മില് സമവായത്തിലെത്തിയില്ലെന്നും സുപ്രീം കോടതി നിരീക്ഷിച്ചു. അതിനാൽ ഇതില് കൂടുതല് ഒന്നും ചെയ്യാനില്ലെന്നും സുപ്രീം കോടതി വ്യക്തമാക്കി. അതുകൊണ്ട് തന്നെ അടുത്ത വ്യാഴാഴ്ചയ്ക്കകം ഒരു പേര് മാത്രം സീല് വെച്ച കവറില് നല്കാനാണ് സുപ്രീം കോടതി നിര്ദേശിച്ചിരിക്കുന്നത്.
ഗവര്ണറും സര്ക്കാരും തമ്മില് സംസാരിച്ചെന്ന് കേന്ദ്രം കോടതിയില് അറിയിച്ചിരുന്നു. എന്നാല് സമവായത്തിലെത്തിയില്ലല്ലോ എന്ന് കോടതി തിരിച്ച് ചോദിച്ചു.
