കോഴിക്കോട്: തെരഞ്ഞെടുപ്പ് വിജയത്തിന്റെ ആഹ്ളാദപ്രകടനത്തിടെ വൻ ദുരന്തം. സ്കൂട്ടർ പൊട്ടിത്തെറിച്ച് പ്രവർത്തകൻ മരിച്ചു. വട്ടോളി സ്വദേശി സന്ദീപാണ് മരിച്ചത്. പനങ്ങാട് പഞ്ചായത്ത് രണ്ടാം വർഡിൽ നിന്നും ജയിച്ച യുഡിഎഫ് സ്ഥാനാർത്ഥി ദേവാനന്ദിന്റെ വിജയാഘോഷത്തിനിടെയാണ് അപകടമുണ്ടായത്. കുറുമ്പൊയിൽ വയലട റൂട്ടിൽ മരത്തുംപടിയിലായിരുന്നു സംഭവം.
അപകടത്തിൽ മറ്റൊരാൾക്കും പരിക്കേറ്റിട്ടുണ്ട്. മരിച്ച യുവാവിന്റെ മൃതദേഹം കോഴിക്കോട് മെഡിക്കൽ കോളേജ് ആശുപത്രിയിൽ സൂക്ഷിച്ചിരിക്കുകയാണ്. ഫയർഫോഴ്സും ബാലുശേരി പൊലീസും സ്ഥലത്തെത്തി പ്രാഥമിക അന്വേഷണം നടത്തി.
മലപ്പുറത്തും സമാനസംഭവമുണ്ടായി. ആഹ്ലാദപ്രകടനത്തിടെ പടക്കം പൊട്ടിത്തെറിച്ച് ലീഗ് പ്രവർത്തകൻ മരിച്ചു. കൊണ്ടോട്ടി സ്വദേശിയായ ഇർഷാദാണ് മരിച്ചത്. സ്കൂട്ടറിന് മുന്നിൽവച്ച പടക്കത്തിലേക്ക് തീപ്പൊരി വീണ് വാഹനം പൊട്ടിത്തെറിക്കുകയായിരുന്നു.
