തിരുവനന്തപുരം: സംസ്ഥാനത്ത് സ്വർണവില വീണ്ടും തിരിച്ചുകയറുന്നു. ഇന്നലെ 1,120 രൂപ കുറഞ്ഞെങ്കിലും ഇന്ന് 480 രൂപ വർധിച്ചു. ഒരു പവൻ സ്വർണത്തിന് 98,640 രൂപയാണ് ഇന്നത്തെ വിപണി വില. 12,330 രൂപയാണ് ഒരു ഗ്രാം സ്വർണത്തിന്റെ വില.
സംസ്ഥാനത്ത് ഒരു പവന്റെ വില ഒരുലക്ഷം കടക്കുമെന്ന് തോന്നിയ ഘട്ടത്തിലാണ് ഇന്നലെ സ്വർണവില കുത്തനെ ഇടിഞ്ഞത്. ഡിസംബർ 15 ന് 99,280 രൂപയാണ് സംസ്ഥാനത്ത് ഇതുവരെയുണ്ടായ ഏറ്റവും ഉയർന്ന നിരക്ക്. എന്നാൽ ഏറ്റവും കുറഞ്ഞ പണിക്കൂലിയും നികുതിയും ചേർത്താൽ തന്നെ ഒരുപവൻ സ്വർണം വാങ്ങണമെങ്കിൽ 1.05 ലക്ഷം കൊടുക്കേണ്ടിവരും.
ആഗോള വിപണിയിലെ അനുകൂല സാഹചര്യങ്ങളും യുഎസ് ഫെഡറല് റിസര്വ് പലിശ നിരക്കുകള് ഇനിയും കുറയ്ക്കുമെന്ന പ്രതീക്ഷയുമാണ് സ്വർണവില തിരിച്ചു കയറാൻ കാരണമായത്. ആഗോള സാമ്പത്തിക ഘടകങ്ങള് സ്വര്ണത്തിന് അനുകൂലമായി തുടരുന്നതിനാല് വില ഇനിയും ഉയരാന് സാധ്യതയുണ്ടെന്നാണ് വിലയിരുത്തൽ.
