ന്യൂഡൽഹി: കൊളോണിയൽ ശേഷിപ്പുകളിൽ നിന്നും രാജ്യത്തെ സ്വാതന്ത്രമാക്കാനുള്ള മോദി സർക്കാരിന്റെ ശ്രമങ്ങളിൽ പങ്കുചേർന്ന് രാഷ്ട്രപതി ഭവനും. രാഷ്ട്രപതി ഭവനിൽ ബ്രിട്ടീഷ് സൈനികരുടെ ഫോട്ടോകൾ പകരം, പരംവീർ ചക്ര നൽകി രാജ്യം ആദരിച്ച ധീര സൈനികരുടെ ഛായചിത്രങ്ങൾ സ്ഥാപിച്ചു. ബ്രിട്ടീഷ് ഭരണകാലത്തെ എയ്ഡ്സ്-ഡി-ക്യാമ്പ് (എഡിസി) കളുടെ ഛായാചിത്രങ്ങളാണ് എടുത്തുമാറ്റിയത്. രാജ്യം പരംവീർ ചക്ര നൽകിയ 21 സൈനികരുടെയും ചിത്രങ്ങൾ രാഷ്ട്രപതി ഭവനിൽ പ്രദർശിപ്പിച്ചിട്ടുണ്ട്.
രാഷ്ട്രപതി ഭവനിൽ പുതുതായി ഒരുക്കിയ ഗാലറിയായ പരംവീർ ദിർഘയുടെ ഉദ്ഘാടനം രാഷ്ട്രപതി ദ്രൗപതി മുർമു നിർവഹിച്ചു. ഡിസംബർ 16 വിജയ് ദിവസിലായിരുന്നു ഗാലറി ഉദ്ഘാടനം. രാജ്യത്തെ ഏറ്റവും ഉയർന്ന സൈനിക ബഹുമതിയാണ് പരംവീർ ചക്ര. യുദ്ധസമയത്ത് ശത്രുവിനെ നേരിടുന്നതിൽ അസാധാരണമായ ധീരത, ധൈര്യം, ആത്മത്യാഗം എന്നി കാണിക്കുന്ന സൈനികരെയാണ് പരംവീർ ചക്ര നൽകി ആദരിക്കുന്നത്.
രാജ്യത്തിന്റെ അജയ്യരായ സൈനികർക്കുള്ള ഉചിതമായ ആദരാഞ്ജലിയായി പരംവീർ ദിർഘ നിലകൊള്ളുന്നുവെന്ന് പ്രധാനമന്ത്രി നരേന്ദ്ര മോദി പറഞ്ഞു. ” മാനസിക അടിമത്തത്തിൽ” നിന്നും രാജ്യത്തെ മോചിപ്പിക്കാനുള്ള മികച്ച ഉദാഹരണമാണിതെന്നും അദ്ദേഹം ചൂണ്ടിക്കാട്ടി.
