കൊച്ചി : രാഹുല് മാങ്കൂട്ടത്തിലില് നിന്ന് ദുരനുഭവം ഉണ്ടായ ഇനിയും അതിജീവിതകളുണ്ടെന്നും അവരും സധൈര്യം മുന്നോട്ട് വരണമെന്നും നടി റിനി ആന് ജോര്ജ്. . ഇത്തരം ആളുകളെ പൊതുജനമധ്യത്തില് തുറന്നുകാട്ടണം എന്നും അവർ ആവശ്യപ്പെട്ടു. എം എല് എയ്ക്കെതിരെ ആദ്യം പരാതി നല്കിയത് നടി റിനി ആന് ജോര്ജ് ആണ്.
പരാതി നല്കിയ യുവതിയെ അഭിനന്ദിക്കുന്നു.സൈബര് ആക്രമണങ്ങളെ ഭയക്കാതെ ധൈര്യത്തോടെ മുന്നോട്ടുവന്ന ധൈര്യത്തെ പ്രശംസിക്കുന്നുവെന്നും റിനി മാധ്യമങ്ങളോട് പറഞ്ഞു.തെരഞ്ഞെടുപ്പ് അവസാനിക്കുകയും രാഹുല് മാങ്കൂട്ടത്തിലിനെ പാര്ട്ടിയില് നിന്ന് പുറത്താക്കുകയും ചെയ്തതിന് ശേഷമാണ് മൂന്നാമത്തെ പരാതി വന്നത്. ഇനിയെങ്കിലും പരാതികള് രാഷ്ട്രീയ പ്രേരിതമെന്ന് പറയരുതെന്ന് റിനി ആന് ജോര്ജ് കൂട്ടിച്ചേര്ത്തു.ഇത്തരം ക്രിമിനലുകള് ഉത്തരവാദിത്തപ്പെട്ട സ്ഥാനങ്ങളിലിരിക്കാന് യോഗ്യരാണോ എന്ന് ജനങ്ങള് ആലോചിക്കണം.
ഉഭയകക്ഷി സമ്മതത്തോടെയുള്ള ബന്ധം നടന്നതിന് ശേഷം പരാതിയുമായി വരുന്നു എന്ന തരത്തിലാണ് ഇപ്പോള് ചര്ച്ചകള് നടക്കുന്നതെന്ന് റിനി പറഞ്ഞു.ഇന്ന് രാഹുലിനെതിരെ പരാതി ഉന്നയിച്ച ഒരു അതിജീവിതയുടെ കുറിപ്പ് വായിക്കാനിടയായി. കണ്ണ് നിറഞ്ഞ് പോയി. കുഞ്ഞിനെ സ്വപ്നം കണ്ട ഒരമ്മയുടെ വേദനയാണത്. കേരളത്തിന്റെ മനസാക്ഷി നിങ്ങള്ക്കൊപ്പമുണ്ട്- റിനി ആന് ജോര്ജ് പറഞ്ഞു.
