മൈ നമ്പർ ഇസ് 2255 മോഹൻലാലിന്റെ ഹിറ്റ് ഡയലോഗുകളിൽ ഒന്നാണ്. ‘രാജാവിന്റെ മകൻ’ എന്ന ചിത്രത്തിലേതാണ് ഈ സംഭാഷണം. കഴിഞ്ഞ ദിവസം 33 ലക്ഷം രൂപ വിലമതിക്കുന്ന ഇന്നോവ ഹൈക്രോസ് കാറിന് 2255 എന്ന നമ്പർ സ്വന്തമാക്കിയതോടെയാണ് ഡയലോഗ് വീണ്ടും ചർച്ചയായത്.
തിങ്കളാഴ്ച എറണാകുളം ആർടിഒ ഓഫീസിൽ നടന്ന ലേലത്തിൽ മോഹൻലാൽ 1.80 ലക്ഷം രൂപയ്ക്കാണ് കെഎൽ 07 ഡിജെ 2255 എന്ന ഫാൻസി നമ്പർ വാങ്ങിയത്. എറണാകുളം ജോയിന്റ് ആർ.ടി.ഒയുടെ നേതൃത്വത്തിൽ ഓൺലൈനായാണ് ലേലം നടന്നത്. ഡിജെ 2255 എന്ന നമ്പറിന് മോഹൻലാൽ ഉൾപ്പെടെ മൂന്ന് പേരാണ് പങ്കെടുത്തത്. 10,000 രൂപയിൽ ആരംഭിച്ച ലേലം 1.45 ലക്ഷം രൂപയിലെത്തി. ഇതോടെ ലാലിന്റെ പ്രതിനിധി ലേലം 1.80 ലക്ഷം രൂപയായി ഉയർത്തി. തുടർന്ന് എതിരാളികൾ പിൻ വാങ്ങുകയായിരുന്നു.
കഴിഞ്ഞ സെപ്റ്റംബറിൽ മോഹൻലാലിന്റെ സുഹൃത്തും ചലച്ചിത്ര നിർമ്മാതാവുമായ ആന്റണി പെരുമ്പാവൂരും 2255 സ്വന്തമാക്കിയിരുന്നു. 3,20,000 രൂപയ്ക്കാണ് കെഎൽ 07 ഡിഎച്ച് 2255 എന്ന നമ്പർ ആന്റണി പെരുമ്പാവൂർ നേടിയെടുത്തത്.
