മുംബൈ: സംഘശതാബ്ദിയുടെ ഭാഗമായി സര്സംഘചാലക് ഡോ. മോഹന് ഭാഗവത് നയിച്ച മുംബൈ വ്യാഖ്യാനമാലയുടെ താരനിബിഡ സദസ് ദേശീയമാധ്യമങ്ങളില് ചര്ച്ചയാകുന്നു. ബോളിവുഡ് സൂപ്പര് താരങ്ങള് വര്ളി നെഹ്റു സെന്റര് ആഡിറ്റോറിയത്തില് രണ്ട് ദിവസമായി നടന്ന പ്രഭാഷണപരമ്പരയിലുടനീളം ബോളിവുഡ് സൂപ്പര്താരങ്ങള് പങ്കെടുത്തതാണ് വാര്ത്തകളില് നിറയുന്നത്. അങ്ങേയറ്റം പ്രേരണാദായകമായ വാക്കുകളാണ് മോഹന്ജിയുടേതെന്ന് താരങ്ങള് മാധ്യമങ്ങളോട് പ്രതികരിച്ചു.
ആദ്യദിവസത്തെ പ്രഭാഷണത്തിനിടയില് സദസിലുണ്ടായിരുന്ന സല്മാന്ഖാന്റെ പേര് സര്സംഘചാലക് പരാമര്ശിച്ചതും കൗതുകമായി. അദ്ദേഹത്തിന്റെ സിനിമകളെക്കുറിച്ചല്ല, യുവാക്കളില് സല്മാന് സൃഷ്ടിക്കുന്ന പ്രഭാവത്തെക്കുറിച്ചാണ് ഡോ. മോഹന് ഭാഗവത് പറഞ്ഞത്. സല്മാന് ഖാന് ധരിക്കുന്നതുപോലെയുള്ള വസ്ത്രങ്ങള് യുവാക്കള് ധരിക്കുന്നു. എന്തുകൊണ്ടാണിതെന്ന് ചോദിച്ചാല് പറയും സല്മാന് ധരിക്കുന്നതുകൊണ്ടാണെന്ന്. അദ്ദേഹം ഈ ഫാഷന് ഉപയോഗിക്കുന്നതിനെന്താണ് കാരണം എന്ന് ചോദിച്ചാല് അതൊന്നും അറിയില്ല, സല്മാന് ധരിക്കുന്നു, ഞങ്ങളും ധരിക്കുന്നു എന്നാണ് ഉത്തരം. സമൂഹത്തില് വിശ്വാസ്യത നേടിയ ആളുകളെ യുവാക്കള് അനുകരിക്കുക സ്വാഭാവികമാണ്, സര്സംഘചാലക് പറഞ്ഞു.
ഗായകനും സംഗീത സംവിധായകനുമായ പദ്മശ്രീ അദ്നാന് സാമി സര്സംഘചാലകുമൊത്തുള്ള ചിത്രം എക്സില് പോസ്റ്റ് ചെയ്തുകൊണ്ടാണ് പരിപാടിയെക്കുറിച്ചുള്ള തന്റെ അഭിപ്രായം രേഖപ്പെടുത്തിയത്. അദ്ദേഹമൊരു ഇതിഹാസമാണെന്നും ആ കൂടിക്കാഴ്ച അവിശ്വസനീയമായിരുന്നുവെന്നും അദ്നാന് സാമി കുറിച്ചു. ഒരുപാട് തെറ്റിദ്ധാരണകള് എനിക്കുണ്ടായിരുന്നു. അദ്ദേഹത്തിന്റെ വാക്കുകള് അതെല്ലാം മായ്ച്ചുകളഞ്ഞു. ആ പ്രസംഗം അങ്ങേയറ്റം സന്തോഷകരമായിരുന്നു, അദ്നാന് സാമി പറഞ്ഞു.
സര്സംഘചാലകന്റെ പ്രഭാഷണത്തെ ‘പ്രചോദനാത്മകം’ എന്നാണ് സിനിമാ നിര്മാതാവ് കരണ് ജോഹര് വിശേഷിപ്പിച്ചത്. സംഘശതാബ്ദിയില് എന്റെ ആശംസകള് നേരുന്നു. മോഹന് ഭാഗവതിന്റെ ഉള്ക്കാഴ്ചയുള്ള പ്രഭാഷണവും ആ നര്മ്മബോധവും എന്നില് ആരാധന സൃഷ്ടിക്കുന്നു, കരണ് ജോഹര് മാധ്യമങ്ങളോട് പറഞ്ഞു.
സംഘത്തിന്റെ നൂറ് വര്ഷത്തെ യാത്രയെ അടയാളപ്പെടുത്തുന്ന പരിപാടിയില് പങ്കെടുക്കാനായത് ഒരു സവിശേഷ അനുഭവമാണെന്നായിരുന്നു നടന് വിക്കി കൗശലിന്റെ അഭിപ്രായം. മോഹന് ഭാഗവത്ജിയുടെ പ്രഭാഷണം ആദ്യമായി കേള്ക്കുന്നത്, അതെന്നില് അതിശയകരമാം വിധം ആഴത്തിലുള്ള മുദ്ര പതിപ്പിച്ചു, വിക്കി കൗശല് പ്രതികരിച്ചു. മോഹന്ജിയുമായി സംസാരിക്കാന് കഴിഞ്ഞ സൗഭാഗ്യനിമിഷങ്ങള് അഭിമാനകരമാണെന്ന് അദ്ദേഹവുമൊത്തുള്ള ചിത്രങ്ങള് ഇന്സ്റ്റഗ്രാമില് പോസ്റ്റ് ചെയ്ത് നടി രൂപാലി ഗാംഗുലി അഭിപ്രായപ്പെട്ടു. മോഹന് ഭാഗവത്ജിയുടെ ആരാധികയാണ് താനെന്നായിരുന്നു ശില്പ ഷെട്ടിയുടെ പ്രതികരണം. രാഷ്ടത്തിനായി സേവനം ചെയ്യാന് അദ്ദേഹത്തിന്റെ വാക്കുകള് എനിക്ക് പ്രേരണ നല്കി. എന്റെ സങ്കല്പങ്ങള് കുറച്ചുകൂടി ദൃഢമായി, ശില്പ പറഞ്ഞു.
രണ്ബീര് കപൂര്, അക്ഷയ് കുമാര്, അനന്യ പാണ്ഡെ, രവീണ ടണ്ടന്, രവി ദുബെ, മധുര് ഭണ്ഡാര്ക്കര്, ജാക്കി ഷ്റോഫ്, സംഗീതസംവിധായകന് പ്രീതം തുടങ്ങി നിരവധി പ്രമുഖരാണ് സിനിമാരംഗത്തുനിന്ന് സര്സംഘചാലകന്റെ പ്രഭാഷണപരമ്പരയില് എത്തിയത്.
