“ജനോത്സവം-2026” നെ വരവേൽക്കാൻ രാജ്യതലസ്ഥാനം ഒരുങ്ങുന്നു. കേരളത്തിന്റെ സ്വന്തം സാംസ്കാരിക കുംഭമേളയായ ജനോത്സവം മാർച്ച്‌ 27, 28, 29 തീയതികളിലായാണ് നടക്കുന്നത്. ജനം ടിവിയും ജനം സൗഹൃദവേദിയും വിവിധ മന്ത്രാലയങ്ങളുടെ സഹകരണത്തോടെ താൽക്കത്തോറ സ്റ്റേഡിയത്തിലാണ് ബൃഹദ് പരിപാടി സംഘടിപ്പിക്കുന്നത്.
പ്രവാസി മലയാളികൾക്ക് ഗൃഹാതുരത്വം ഉണർത്തുന്ന കലാ – സാംസ്കാരിക പരിപാടികളാണ് ജനോത്സവത്തിന്റെ സവിശേഷത. നിരവധി പ്രശസ്ത സിനിമാ താരങ്ങളും പിന്നണി ഗായകരും സംവിധായകരും നാടൻകലകാരൻമാരും കലാകുംഭമേളയുടെ ഭാഗമാകുന്നുണ്ട്. കലാപരിപാടികൾക്കൊപ്പം ശില്പശാലയും ചർച്ചയും ഇവിടെ കോർത്തിണക്കിയിട്ടുണ്ട്. ഇതിനോടനുബന്ധിച്ചു രുചികരമായ ഭക്ഷണം ലഭ്യമാക്കുന്ന ഭക്ഷ്യശാലകളും ആയുർവേദ- സുഗന്ധവ്യഞ്ജന സ്റ്റാളുകളും പുസ്‌തകശാലകളും ഒരുക്കുന്നുണ്ട്.
പ്രശസ്ത സിനിമാതാരം ശോഭന അവതരിപ്പിക്കുന്ന ‘ലാസ്യ ജ്യോതി’, ലക്ഷ്മി ഗോപാലസ്വാമിയുടെ ‘ആനന്ദനൃത്തം’, കെ. എസ് ചിത്രയുടെ ‘ചിത്രാഞ്ജലി’, ആശ ശരത്തിന്റെ ‘റിഥം ഓഫ് ദ സെക്രഡ് ഫെമിനിൻ’, നടൻ ജയറാമും കലാമണ്ഡലത്തിലെ വാദ്യ കലാകാരൻമാരും അവതരിപ്പിക്കുന്ന മേളം, സ്റ്റീഫൻ ദേവസിയുടെ മ്യൂസിക്ക് ഇവന്റ്, പ്രമുഖ കലാകാരൻമാ‍ർ അണിനിരക്കുന്ന പഞ്ചവാദ്യം, ഡബിൾ തായമ്പക, മേ‍ജർ സെറ്റ് കഥകളി എന്നിവ ജനോത്സവത്തിൽ അരങ്ങേറും. www.janolsavam.com എന്ന വെബ്സൈറ്റിലൂടെ ഓൺലൈനായാണ് ടിക്കറ്റ് ബുക്ക് ചെയ്യേണ്ടത്. ഗോൾഡ്, ഡയമണ്ട്, പ്ലാറ്റിനം എന്നീ മൂന്ന് വിഭാഗങ്ങളായാണ് ടിക്കറ്റുകൾ ക്രമീകരിച്ചിരിക്കുന്നത്.
