ന്യൂയോർക്ക്: അമേരിക്കയിലെ ന്യൂയോർക്കിലുള്ള ലാഗ്വാർഡിയ വിമാനത്താവളത്തിൽ റൺവേയിൽ വെച്ച് എയർ കാനഡ എക്സ്പ്രസ് വിമാനം ഫയർ ട്രക്കുമായി കൂട്ടിയിടിച്ചു.
വിമാനം റൺവേയിലൂടെ നീങ്ങുന്നതിനിടെ വിമാനത്താവളത്തിലെ അഗ്നിശമന സേനയുടെ വാഹനത്തിൽ തട്ടുകയായിരുന്നു. അപകടസമയത്ത് വിമാനത്തിൽ യാത്രക്കാരും ജീവനക്കാരും ഉണ്ടായിരുന്നു. അപകടത്തിൽ നിരവധി പേർക്ക് പരിക്ക്. കൂട്ടിയിടിയെത്തുടർന്ന് വിമാനത്തിന്റെ ചിറകിന് കേടുപാടുകൾ സംഭവിച്ചിട്ടുണ്ട്.
അപകടത്തെത്തുടർന്ന് വിമാനത്തിലെ യാത്രക്കാരെ ഉടൻ തന്നെ പുറത്തിറക്കി ടർമിനലിലേക്ക് മാറ്റി. ഇവർക്കായി മറ്റൊരു വിമാനം ഏർപ്പെടുത്തിയതായി എയർലൈൻ അധികൃതർ അറിയിച്ചു. സംഭവത്തിൽ വിമാനത്താവള അധികൃതരും ഫെഡറൽ ഏവിയേഷൻ അഡ്മിനിസ്ട്രേഷനും അന്വേഷണം ആരംഭിച്ചു. എങ്ങനെയാണ് വിമാനം ഫയർ ട്രക്കുമായി കൂട്ടിയിടിച്ചത് എന്നതിനെക്കുറിച്ച് വിശദമായ പരിശോധന നടന്നുവരികയാണ്.
അപകടത്തെത്തുടർന്ന് ലാഗ്വാർഡിയ വിമാനത്താവളത്തിലെ ചില സർവീസുകൾക്ക് നേരിയ തടസ്സമുണ്ടായെങ്കിലും പിന്നീട് പ്രവർത്തനം സാധാരണ നിലയിലായി.
