ന്യൂഡൽഹി : ജനം ടിവിയും ജനം സൗഹൃദവേദിയും വിവിധ മന്ത്രാലയങ്ങളുടെ സഹകരണത്തോടെ താൽക്കത്തോറ സ്റ്റേഡിയത്തിൽ സംഘടിപ്പിക്കുന്ന സാംസ്കാരിക മഹാമഹം ജനോത്സവത്തിനു തിരി തെളിഞ്ഞു. മലയാള സിനിമയുടെ സൂപ്പർതാരം മോഹൻലാൽ ആണ് ഉദ്‌ഘാടനം നിർവഹിച്ചത്. കേരളത്തിന്റെ സാംസ്കാരിക തനിമ പ്രവാസലോകത്തും ദേശീയതലസ്ഥാനത്തും എത്തിക്കുക എന്ന ലക്ഷ്യത്തോടെ ജനം സൗഹൃദവേദിയും ജനം ടിവിയും സംയുക്തമായി സംഘടിപ്പിക്കുന്ന വിസ്മയക്കാഴ്ചയാണിത്.
നൻമ ചിന്തിച്ചാണ് ജനം ടീവി ആരംഭിച്ചത് എന്ന് ജനം ടി വി ചെയർമാൻ പ്രിയദർശൻ പറഞ്ഞു. സാംസ്കാരിക കേരളത്തെ തലസ്ഥാനത്തേക്ക് പറച്ച് നട്ടതാണ് ജനോത്സവം എന്നും ഇത് വൈവിധ്യത്തിൽ ഊന്നിയ ദേശീയതയുടെ ദേശീയതയുടെ തിരിച്ചറിവ് ആണെന്നും, സാംസ്കാരിക ഉത്സവമാണെന്നും ഉദ്‌ഘാടന പ്രസംഗത്തിൽ മോഹൻലാൽ പറഞ്ഞു. നാനാത്വത്തിൽ ഏകത്വം തിരിച്ചറിയാനുള്ള അസുലഭ അവസരമാണ് ജനോത്സവം എന്നും അദ്ദേഹം കൂട്ടിച്ചേർത്തു.
ചടങ്ങിൽ നടൻ ചെയർമാൻ ജയറാം,ജനം ടി വി ചെയർമാൻ പ്രിയദർശൻ, നടൻ ശങ്കർ,ജി അശോക് കുമാർ ഐ എ എസ് , ജനം ടി വി എക്സിക്യൂട്ടീവ് ചെയർമാൻ ജി സുരേഷ് കുമാർ, സി സദാനന്ദൻ മാസ്റ്റർ എം പി , രാജീവ് അഞ്ചൽ, ദൂരദർശൻ ഡയറക്ടർ ജനറൽ സതീഷ് നമ്പൂതിരിപ്പാട്, ഇന്ത്യൻ ഹാബിറ്റാറ്റ് സെൻ്റ് ഡയറക്ടർ കെ.ജി സുരേഷ്, ജനം ടിവിയുടെ ഡയറക്ടർമാർ തുടങ്ങിയവർ പങ്കെടുത്തു.
ഇന്ദ്രപ്രസ്ഥത്തിലെ ഈ ‘കേരള കലാകുംഭമേളയ്‌ക്ക്’ ഡൽഹിയിലെ താൽക്കത്തോറ സ്റ്റേഡിയമാണ് വേദിയാകുന്നത്. കലയുടെയും സംസ്കാരത്തിന്റെയും പൈതൃകത്തിന്റെയും സംഗമഭൂമിയായി മാറുന്ന സ്റ്റേഡിയത്തിൽ മാർച്ച് 27, 28, 29 തീയതികളിലായാണ് മേള നടക്കുന്നത്. കേരളത്തിന്റെ സാംസ്കാരിക വിശ്വരൂപമാണ് ഈ മൂന്നു ദിവസങ്ങളിലായി അനാവരണം ചെയ്യപ്പെടുന്നത്.
പ്രശസ്ത നർത്തകിമാരായ ശോഭന, ലക്ഷ്മി ഗോപാലസ്വാമി എന്നിവരുടെ നൃത്തവിരുന്നുകളും, സംഗീത സാമ്രാജ്യത്തിലെ വാനമ്പാടി കെ.എസ്. ചിത്ര അവതരിപ്പിക്കുന്ന ‘ചിത്രാഞ്ജലി’യും ഉത്സവത്തിന് മാറ്റുകൂട്ടും. കൂടാതെ, ജയറാം നയിക്കുന്ന ഇലഞ്ഞിത്തറ മേളത്തിന്റെ ആവേശവും കഥകളി, തെയ്യം, പടയണി തുടങ്ങിയ കലാരൂപങ്ങളും ഡൽഹിയുടെ മണ്ണിൽ കേരളീയാന്തരീക്ഷം സൃഷ്ടിക്കും.
