ഗുവാഹത്തി: ഐപിഎലിന്റെ മൂന്നാം മത്സരത്തിൽ ചെന്നൈ സൂപ്പർ കിംഗ്സിനെതിരെ രാജസ്ഥാൻ റോയൽസിന് എട്ട് വിക്കറ്റിന്റെ തകർപ്പൻ വിജയം. ബാറ്റിംഗിലും ബൗളിംഗിലും ഒരുപോലെ ആധിപത്യം പുലർത്തിയ രാജസ്ഥാൻ, ചെന്നൈ ഉയർത്തിയ 128 റൺസ് വിജയലക്ഷ്യം വെറും 12.1 ഓവറിൽ മറികടന്നു.
വെറും 12 പന്തിൽ 52 റൺസ് അടിച്ചുകൂട്ടിയ യുവതാരം വൈഭവ് സൂര്യവംശിയാണ് രാജസ്ഥാന്റെ വിജയം എളുപ്പമാക്കിയത്. ആദ്യം ബാറ്റ് ചെയ്ത ചെന്നൈയെ കുറഞ്ഞ സ്കോറിൽ ഒതുക്കാൻ രാജസ്ഥാൻ ബൗളർമാർക്ക് സാധിച്ചു. മികച്ച ബൗളിംഗ് പ്രകടനം കാഴ്ചവെച്ച നാന്ദ്രെ ബർഗറാണ് മാൻ ഓഫ് ദി മാച്ച്.
ചെന്നൈ സൂപ്പർ കിംഗ്സിനായി അരങ്ങേറ്റം കുറിച്ച സഞ്ജു സാംസൺ, തന്റെ മുൻ ടീമായ രാജസ്ഥാൻ റോയൽസിനെതിരെ വെറും 6 റൺസെടുത്ത് പുറത്തായി. കഴിഞ്ഞ സീസണുകളിലെ ആദ്യ മത്സരങ്ങളിൽ സഞ്ജു അർദ്ധസെഞ്ച്വറി നേടിയിരുന്നു. എന്നാൽ വിക്കറ്റ് കീപ്പിംഗിലും ബാറ്റിംഗിലും ധോണിക്ക് പകരക്കാരനായി എത്തിയ സഞ്ജുവിന് ഇത്തവണ നിരാശയായിരുന്നു ഫലം.
ഇന്ന് രാത്രി 7:30-ന് നടക്കുന്ന മത്സരത്തിൽ പഞ്ചാബ് കിംഗ്സ്, ഗുജറാത്ത് ടൈറ്റൻസിനെ നേരിടും.
