തിരുവനന്തപുരം: യുഡിഎഫ് അധികാരത്തിൽ വന്നില്ലെങ്കിൽ പ്രതിപക്ഷ നേതാവ് വി.ഡി. സതീശൻ രാഷ്ട്രീയ വനവാസത്തിന് പോകേണ്ടി വരുമെന്ന് കെ. സുധാകരൻ. സതീശൻ വാക്ക് പാലിക്കുന്ന നേതാവാണെങ്കിൽ പ്രഖ്യാപിച്ചത് പോലെ വനവാസത്തിന് പോകേണ്ടി വരുമെന്ന് അദ്ദേഹം പത്തനംതിട്ടയിൽ മാധ്യമങ്ങളോട് വ്യക്തമാക്കി.
തിരഞ്ഞെടുപ്പിൽ യുഡിഎഫിന് നൂറ് സീറ്റുകൾ ലഭിച്ചില്ലെങ്കിൽ താൻ രാഷ്ട്രീയ വനവാസത്തിന് പോകുമെന്ന് വി.ഡി. സതീശൻ നേരത്തെ പ്രഖ്യാപിച്ചിരുന്നു. ഇതിനെക്കുറിച്ചുള്ള മാധ്യമങ്ങളുടെ ചോദ്യത്തോട് പ്രതികരിക്കുമ്പോഴാണ് സുധാകരൻ തന്റെ നിലപാട് അറിയിച്ചത്. “സതീശൻ വാക്ക് പാലിക്കുന്ന നേതാവാണെങ്കിൽ പോകേണ്ടി വരുമല്ലോ, സ്വാഭാവികമായും അതിൽ ഞങ്ങൾക്ക് സങ്കടമുണ്ട്” എന്നായിരുന്നു സുധാകരന്റെ മറുപടി. തെരെഞ്ഞെടുപ്പിൽ യു ഡി എഫ് പരാജയപ്പെടുമെന്നും സതീശൻ പറഞ്ഞ വാക്ക് പാലിക്കപ്പെടണം എന്നുമുളള രീതിയിലാണ് സുധാകരൻ സംസാരിച്ചത്.
സതീശൻ അത്തരത്തിൽ വനവാസത്തിന് പോകുന്നത് തങ്ങൾക്ക് വിഷമമുണ്ടാക്കുന്ന കാര്യമാണെന്നും അതുകൊണ്ട് അങ്ങനെ സംഭവിക്കാതിരിക്കാൻ നമുക്കെല്ലാവർക്കും പ്രാർത്ഥിക്കാമെന്നും കൂടി സുധാകരൻ കൂട്ടിച്ചേർത്തു. യുഡിഎഫ് അധികാരത്തിൽ വരുമെന്ന വലിയ ആത്മവിശ്വാസം സുധാകരൻ പ്രകടിപ്പിച്ചെങ്കിലും സതീശൻ വാക്ക് പാലിക്കുന്ന നേതാവാണെന്ന് ഓർമ്മിപ്പിച്ചതിലൂടെ യു ഡി എഫ്പ തോൽക്കും എന്നുള്ള ചർച്ചകളും രാഷ്ട്രീയ വൃത്തങ്ങളിൽ സജീവമാണ്.
വീണ്ടും കെപിസിസി പ്രസിഡന്റ് സ്ഥാനത്തേക്ക് താൻ വരുമോ എന്ന് ഇപ്പോൾ പ്രവചിക്കാൻ കഴിയില്ലെന്നും രാഷ്ട്രീയത്തിൽ അത്തരം പ്രവചനങ്ങൾ ആവശ്യമില്ലെന്നും അദ്ദേഹം പറഞ്ഞു. സമയോചിതമായ തീരുമാനങ്ങളാകും പിന്നീട് ഉണ്ടാകുകയെന്നും അദ്ദേഹം വ്യക്തമാക്കി.
