നാഗ്പൂർ: ആർഎസ്എസിന്റെ നാഗ്പൂരിലെ ആസ്ഥാനത്തിന് സമീപത്തുനിന്ന് വൻതോതിൽ സ്ഫോടക വസ്തുക്കൾ കണ്ടെടുത്തു. ആസ്ഥാനമന്ദിരത്തിൽ നിന്ന് ഏകദേശം രണ്ട് കിലോമീറ്റർ മാത്രം അകലെയുള്ള സി. എ റോഡിലെ ഒരു വീടിന്റെ പൂന്തോട്ടത്തിൽ ഉപേക്ഷിക്കപ്പെട്ട നിലയിലുള്ള ബാഗിൽ നിന്നാണ് സ്ഫോടക വസ്തുക്കൾ കണ്ടെത്തിയത്.
15 ജലാറ്റിൻ സ്റ്റിക്കുകൾ, 50-ലധികം ഡിറ്റണേറ്ററുകൾ, 8 കണക്ടറുകൾ എന്നിവ പോലീസ് കണ്ടുകെട്ടി. സംഭവത്തെത്തുടർന്ന് നാഗ്പൂർ നഗരത്തിൽ അതീവ ജാഗ്രത പ്രഖ്യാപിച്ചു. ആർഎസ്എസ് ആസ്ഥാനം, പ്രധാന ആരാധനാലയങ്ങൾ എന്നിവിടങ്ങളിൽ സുരക്ഷാ സേന പരിശോധന കർശനമാക്കിയിട്ടുണ്ട്.
സ്ഫോടക വസ്തുക്കൾ കണ്ടെടുത്ത പ്രദേശത്ത് നിന്ന് 1.5 മുതൽ 2 കിലോമീറ്റർ വരെ ചുറ്റളവിലാണ് ആർഎസ്എസ് ആസ്ഥാനം സ്ഥിതി ചെയ്യുന്നത്. ബോംബ് സ്ക്വാഡ്, ഫോറൻസിക് സംഘം, പൊലീസ് എന്നീ വിഭാഗങ്ങൾ സംയുക്തമായി പ്രദേശം വളഞ്ഞിട്ടുണ്ട്. സ്ഫോടക വസ്തുക്കൾ സുരക്ഷിതമായി സ്ഥാനത്തേക്ക് മാറ്റിയിട്ടുണ്ട്. സ്ഫോടക വസ്തുക്കൾ ഒരു മാസത്തിലേറെയായി ഇവിടെ സൂക്ഷിച്ചിട്ടുണ്ടെന്നാണ് പ്രാഥമിക വിവരം. എല്ലാം ദിശകളിലേക്കും അന്വേഷണം നടത്തിവരികയാണെന്ന് നാഗ്പൂര് ജോയിന്റ് പോലീസ് കമ്മീഷണര് നവീന്ചന്ദ്ര റെഡ്ഡി പറഞ്ഞു.
