തിരുവനന്തപുരം: വോട്ടവകാശത്തിന്റെ പ്രാധാന്യം യുവതലമുറയെ ബോധ്യപ്പെടുത്തുന്നതിനായി ‘നേഷൻ ഫസ്റ്റ്, വോട്ടിംഗ് മസ്റ്റ്’ എന്ന പേരിൽ എ.ബി.വി.പി സംസ്ഥാനവ്യാപകമായി ക്യാമ്പയിൻ സംഘടിപ്പിക്കുന്നു. രാഷ്ട്രീയ പാർട്ടികളോടുള്ള വ്യക്തിപരമായ എതിർപ്പുകൾ കാരണം സമ്മതിദാന അവകാശം വിനിയോഗിക്കാതിരിക്കരുതെന്നും രാഷ്ട്രത്തിന്റെ സുരക്ഷയ്ക്കും വികസനത്തിനും മുൻഗണന നൽകുന്ന പ്രസ്ഥാനങ്ങളെ പിന്തുണയ്ക്കണമെന്നും ക്യാമ്പയിൻ ആഹ്വാനം ചെയ്യുന്നു.
ഓരോ വോട്ടും രാജ്യത്തിന്റെ ഭാവിയെ നിർണ്ണയിക്കുന്നതാണെന്ന് ക്യാമ്പയിൻ ഊന്നിപറയുന്നു. കേരളത്തിലെ കോളേജുകളിൽ സീറ്റുകൾ ഒഴിഞ്ഞുകിടക്കുന്നതും ഉപരിപഠനത്തിനായി വിദ്യാർത്ഥികൾ വൻതോതിൽ വിദേശങ്ങളിലേക്ക് പോകുന്നതും ഗൗരവകരമായ സാഹചര്യമാണ്. ഈ അവസ്ഥയ്ക്ക് മാറ്റം വരണമെങ്കിൽ ശരിയായ രാഷ്ട്രീയ തീരുമാനങ്ങൾ അനിവാര്യമാണെന്ന് എ.ബി.വി.പി ചൂണ്ടിക്കാട്ടുന്നു. കേന്ദ്രസർക്കാരിന്റെ വികസന പദ്ധതികളിലൂടെ രാജ്യം കുതിക്കുമ്പോൾ, കേരളം ആ വികസന വേഗതയ്ക്കൊപ്പം എത്തുന്നില്ല എന്ന് ക്യാമ്പയിൻ ഓർമ്മിപ്പിക്കുന്നു.
എന്തിനുവേണ്ടി വോട്ട് ചെയ്യണം എന്ന കാര്യത്തിൽ യുവാക്കൾക്കിടയിൽ വ്യക്തമായ ധാരണയുണ്ടാക്കുകയാണ് ഇവരുടെ ലക്ഷ്യം. മോദി സർക്കാരിന്റെ വികസന നേട്ടങ്ങൾ ജനങ്ങളിലെത്തിക്കുന്നതിനൊപ്പം, കേരളത്തിന്റെ നിലവിലെ സാഹചര്യം മാറാൻ യുവാക്കളുടെ ഇടപെടൽ അത്യാവശ്യമാണെന്നും എ.ബി.വി.പി നേതാക്കൾ വ്യക്തമാക്കി.
