തിരുവനന്തപുരം: കുംഭമേളയിലെ വൈറല് താരം മൊണാലിസയുടെ വിവാഹം നടത്തിക്കൊടുത്തതുമായി ബന്ധപ്പെട്ട വിവാദങ്ങളില് വിചിത്രമായ വിശദീകരണവുമായി സിപിഐ സംസ്ഥാന സെക്രട്ടറി ബിനോയ് വിശ്വം. വിവാഹസമയത്ത് പെണ്കുട്ടിക്ക് പ്രായപൂര്ത്തിയായിരുന്നുവെന്നും ഇത് യഥാര്ത്ഥ ‘കേരള സ്റ്റോറി’യാണെന്നുമാണ് അദ്ദേഹത്തിന്റെ വാദം. തിരുവനന്തപുരത്ത് മാധ്യമപ്രവര്ത്തകരോട് സംസാരിക്കവെയാണ് അദ്ദേഹം ഈ നിലപാടുകള് വ്യക്തമാക്കിയത്.
മൊണാലിസയുടെ കൃത്യമായ ജനനത്തീയതി അറിയില്ലെന്ന് സമ്മതിച്ച ബിനോയ് വിശ്വം, പെണ്കുട്ടിയെ കണ്ടപ്പോള് പ്രായപൂര്ത്തിയായതായി തോന്നിയതിനാലാണ് വിവാഹം നടത്തിക്കൊടുത്തതെന്ന് പറഞ്ഞു. ‘ആധാര് കാര്ഡ് അടിസ്ഥാന രേഖയായി പരിശോധിച്ചിരുന്നു, അതില് പ്രായപൂര്ത്തിയായതായാണ് കണ്ടത്. ഈ വിവാഹത്തിന് പിന്നില് കൃത്യമായ രാഷ്ട്രീയ അജണ്ടയുണ്ട്,’ അദ്ദേഹം വെളിപ്പെടുത്തി. വിശദീകരണത്തിനിടെ ഒരു മാധ്യമപ്രവര്ത്തകന് ചിരിച്ചത് ബിനോയ് വിശ്വത്തെ ചൊടിപ്പിച്ചു. ഇതോടെ വാര്ത്താസമ്മേളനത്തില് നാടകീയ രംഗങ്ങള് അരങ്ങേറി. മാധ്യമപ്രവര്ത്തകനെ രൂക്ഷമായി ശാസിച്ച അദ്ദേഹം, ഗൗരവമായ കാര്യങ്ങള് പറയുമ്പോള് ചിരിക്കുന്നത് പ്രായക്കുറവിന്റെ ലക്ഷണമാണെന്ന് കുറ്റപ്പെടുത്തി.
‘താന് എന്തിനാണ് ചിരിക്കുന്നത്? നമ്മളിവിടെ തമാശയല്ല പറയുന്നത്. ഗൗരവമായി രാഷ്ട്രീയം സംസാരിക്കുമ്പോള് ചിരിക്കരുത്. ഇത് പ്രായക്കുറവിന്റെ ലക്ഷണമാണ്. ആവശ്യമുള്ള കാര്യം മാത്രം ചോദിച്ചാല് മതി,’ ബിനോയ് വിശ്വം ദേഷ്യപ്പെട്ടുകൊണ്ട് പറഞ്ഞു. വിവാദമായ ഈ വിവാഹത്തെ രാഷ്ട്രീയമായി ന്യായീകരിക്കാന് ശ്രമിക്കുന്നതിനിടെ മാധ്യമപ്രവര്ത്തകരോട് പ്രകോപിതനായ സി.പി.ഐ സംസ്ഥാന സെക്രട്ടറിയുടെ നടപടി ഇപ്പോള് രാഷ്ട്രീയ വൃത്തങ്ങളില് വലിയ ചര്ച്ചയായിരിക്കുകയാണ്. വിവാഹത്തിന്റെ നിയമസാധുതയെക്കുറിച്ചും പരിശോധിച്ച രേഖകളുടെ വിശ്വാസ്യതയെക്കുറിച്ചും കൂടുതല് ചോദ്യങ്ങള് ഉയരുന്നുണ്ടെങ്കിലും തന്റെ നിലപാടില് ഉറച്ചുനില്ക്കുകയാണ് അദ്ദേഹം.
