പട്‌ന: ബിഹാറില്‍ വലിയ രാഷ്ട്രീയ മാറ്റത്തിന് വഴിയൊരുങ്ങുന്നു. ബിജെപി നിയമസഭാ കക്ഷി നേതാവായി സാമ്രാട്ട് ചൗധരിയെ തെരഞ്ഞെടുത്തു. ഇതോടെ ബിഹാര്‍ മുഖ്യമന്ത്രി പദത്തിലേക്ക് ബിജെപിയില്‍ നിന്നുള്ള ആദ്യ നേതാവായി സാമ്രാട്ട് ചൗധരി മാറും. നിലവിലെ മുഖ്യമന്ത്രി നിതീഷ് കുമാര്‍ രാജ്യസഭയിലേക്ക് മാറുന്ന സാഹചര്യത്തിലാണ് ഈ നിര്‍ണ്ണായക നീക്കം. പട്‌നയിലെ പാര്‍ട്ടി ആസ്ഥാനത്ത് ചേര്‍ന്ന യോഗത്തിലാണ് ചൗധരിയെ നേതാവായി തിരഞ്ഞെടുത്തത്. അദ്ദേഹം ഉടന്‍ തന്നെ ഗവര്‍ണറെ കണ്ട് സര്‍ക്കാര്‍ രൂപീകരിക്കാനുള്ള അവകാശവാദം ഉന്നയിക്കും. ഏപ്രില്‍ 15-ന് അദ്ദേഹം സത്യപ്രതിജ്ഞ ചെയ്ത് അധികാരമേല്‍ക്കുമെന്നാണ് സൂചന.
മുന്‍ഗര്‍ ജില്ലയിലെ രാഷ്ട്രീയ സ്വാധീനമുള്ള കുടുംബത്തില്‍ 1968 നവംബര്‍ 16-നാണ് സാമ്രാട്ട് ചൗധരി ജനിച്ചത്. മൂന്ന് പതിറ്റാണ്ടിലേറെയായി രാഷ്‌ട്രീയത്തില്‍ സജീവമായ അദ്ദേഹം രാഷ്ട്രീയ ജനതാദളിലൂടെയാണ് (ഞഖഉ) കരിയര്‍ തുടങ്ങിയത്. റാബ്രി ദേവി മന്ത്രിസഭയില്‍ അദ്ദേഹം അംഗമായിരുന്നു. 2018-ലാണ് ചൗധരി ബിജെപിയില്‍ ചേര്‍ന്നത്. 2020-ലെ തിരഞ്ഞെടുപ്പിന് ശേഷം സുശീല്‍ കുമാര്‍ മോദി ഡല്‍ഹിയിലേക്ക് മാറിയതോടെ പാര്‍ട്ടിയില്‍ ചൗധരിയുടെ പ്രാധാന്യം വര്‍ദ്ധിച്ചു.
2023-ല്‍ ബിജെപി സംസ്ഥാന അധ്യക്ഷനായി നിയമിതനായ അദ്ദേഹം, 2024-ല്‍ നിതീഷ് കുമാര്‍ എന്‍ഡിഎയില്‍ തിരിച്ചെത്തിയപ്പോള്‍ ഉപമുഖ്യമന്ത്രിയായി. 2025-ലെ നിയമസഭാ തിരഞ്ഞെടുപ്പിന് ശേഷവും അദ്ദേഹം ആ പദവിയില്‍ തുടര്‍ന്നു. ബിഹാറിലെ നിര്‍ണ്ണായകമായ ‘ലവ്-കുഷ്’ (കുര്‍മി-കുശ്വാഹ) ജാതി സമവാക്യത്തില്‍ കുശ്വാഹ വിഭാഗത്തില്‍ നിന്നുള്ള നേതാവാണ് ചൗധരി. നിതീഷ് കുമാറിന്റെ കുര്‍മി വോട്ട് ബാങ്കിനൊപ്പം കുശ്വാഹ വിഭാഗത്തെ കൂടി ചേര്‍ത്തുനിര്‍ത്താനുള്ള എന്‍ഡിഎയുടെ തന്ത്രപരമായ നീക്കമായാണ് അദ്ദേഹത്തിന്റെ മുഖ്യമന്ത്രി പദത്തെ രാഷ്ട്രീയ നിരീക്ഷകര്‍ കാണുന്നത്.
വിദ്യാഭ്യാസ യോഗ്യതയുമായി ബന്ധപ്പെട്ട ചില വിവാദങ്ങള്‍ പ്രശാന്ത് കിഷോറിനെപ്പോലെയുള്ളവര്‍ ഉയര്‍ത്തിയിരുന്നെങ്കിലും, അതൊന്നും ചൗധരിയുടെ രാഷ്ട്രീയ വളര്‍ച്ചയെ ബാധിച്ചില്ല. ബിഹാറില്‍ ബിജെപിക്ക് സ്വന്തമായി ഒരു മുഖ്യമന്ത്രി ഉണ്ടാകുന്നു എന്നത് പാര്‍ട്ടി പ്രവര്‍ത്തകര്‍ വലിയ ആവേശത്തോടെയാണ് കാണുന്നത്.
