മെല്‍ബണ്‍: ഓസ്ട്രേലിയന്‍ ക്രിക്കറ്റ് ഇതിഹാസം ഷെയ്ന്‍ വോണിന്റെ അപ്രതീക്ഷിത വേര്‍പാടിന് നാല് വര്‍ഷം തികയുമ്പോള്‍, അദ്ദേഹത്തിന്റെ മരണകാരണത്തെക്കുറിച്ച് ഞെട്ടിക്കുന്ന വെളിപ്പെടുത്തലുമായി മകന്‍ ജാക്‌സണ്‍ വോണ്‍ രംഗത്ത്. കോവിഡ് വാക്‌സീന്‍ സ്വീകരിച്ചതാണ് തന്റെ പിതാവിന്റെ ജീവനെടുത്തതെന്നാണ് ജാക്‌സന്റെ ഗുരുതരമായ ആരോപണം. ഒരു പോഡ്കാസ്റ്റ് അഭിമുഖത്തിനിടെയാണ് അദ്ദേഹം മനസ്സ് തുറന്നത്.
ഔദ്യോഗിക ആവശ്യങ്ങള്‍ക്കായി മൂന്നോ നാലോ തവണ വോണ്‍ കോവിഡ് വാക്‌സീന്‍ എടുക്കാന്‍ നിര്‍ബന്ധിതനായെന്നും അദ്ദേഹത്തിന് അതില്‍ താല്പര്യമില്ലായിരുന്നുവെന്നും ജാക്‌സണ്‍ പറയുന്നു. പുകവലിയും മദ്യപാനവും ഉണ്ടായിരുന്നെങ്കിലും മരിക്കുമ്പോള്‍ വോണ്‍ നല്ല ആരോഗ്യവാനായിരുന്നു. വാക്‌സീന്‍ എടുത്തതോടെ അദ്ദേഹത്തിനുണ്ടായിരുന്ന ചെറിയ ആരോഗ്യപ്രശ്‌നങ്ങള്‍ വഷളായതാകാം ഹൃദയാഘാതത്തിലേക്ക് നയിച്ചതെന്ന് ജാക്‌സണ്‍ സംശയിക്കുന്നു.
മരണവാര്‍ത്ത അറിഞ്ഞ ഉടന്‍ തന്നെ സര്‍ക്കാരിനെയും വാക്‌സീന്‍ നയത്തെയുമാണ് താന്‍ കുറ്റപ്പെടുത്തിയതെന്ന് അദ്ദേഹം വെളിപ്പെടുത്തി. സംസ്‌കാര ചടങ്ങില്‍ ഈ പ്രതിഷേധം പരസ്യമായി പറയാന്‍ ആഗ്രഹിച്ചിരുന്നെങ്കിലും അന്ന് സ്വയം നിയന്ത്രിക്കുകയായിരുന്നു. ‘വാക്‌സീന്‍ എടുത്തതാണ് ഡാഡിയുടെ മരണത്തിന് കാരണമായതെന്ന് പറയുന്നതില്‍ ഇപ്പോള്‍ ഒരു വിവാദമുണ്ടെന്ന് ഞാന്‍ കരുതുന്നില്ല. ഇത് എന്നെ എപ്പോഴും അലട്ടുന്ന കാര്യമാണ്. ദേഷ്യം കൂടുമെന്നതിനാല്‍ ഇപ്പോള്‍ ഇതിനെക്കുറിച്ച് കൂടുതല്‍ ചിന്തിക്കാതിരിക്കാന്‍ ശ്രമിക്കുകയാണ്,’ – ജാക്‌സണ്‍ വോണ്‍ വ്യക്തമാക്കി.
2022 മാര്‍ച്ചില്‍ തായ്‌ലന്‍ഡിലെ റിസോര്‍ട്ടില്‍ വെച്ചാണ് 52 വയസ്സുകാരനായ ഷെയ്ന്‍ വോണിനെ മരിച്ച നിലയില്‍ കണ്ടെത്തിയത്. അക്കാലത്ത് താരത്തിന് മറ്റ് വലിയ അസുഖങ്ങളൊന്നും ഉണ്ടായിരുന്നില്ല. മരണത്തിന് ഏതാനും മാസങ്ങള്‍ക്ക് മുമ്പ് വോണിന് കോവിഡ് ബാധിച്ചിരുന്നുവെങ്കിലും അദ്ദേഹം അതില്‍ നിന്ന് പൂര്‍ണ്ണമായി മുക്തനായിരുന്നു. വര്‍ഷങ്ങള്‍ക്കിപ്പുറം മകന്‍ തന്നെ ഇത്തരമൊരു സംശയം ഉന്നയിച്ചത് ക്രിക്കറ്റ് ലോകത്ത് വലിയ ചര്‍ച്ചകള്‍ക്ക് വഴിതുറന്നിരിക്കുകയാണ്.
