കൊച്ചി: നന്മയുടെയും സമൃദ്ധിയുടെയും പ്രതീകമായി വീണ്ടും ഒരു വിഷുക്കാലം കൂടി എത്തിയിരിക്കുന്നു. സൂര്യന് രാശിചക്രം മാറി മേടത്തിലേക്ക് പ്രവേശിക്കുന്ന ഈ ശുഭമുഹൂര്ത്തത്തെ ഭക്തിനിര്ഭരമായ ചടങ്ങുകളോടെയാണ് ലോകമെമ്പാടുമുള്ള മലയാളി സമൂഹം സ്വീകരിക്കുന്നത്. രാത്രിയില് തന്നെ ഒരുക്കിയ ചമയങ്ങള്ക്കിടയില് നിന്നും ഐശ്വര്യത്തിന്റെ പൊന്കണി കണ്ടാണ് മലയാളി ഇന്ന് ഉറക്കമുണര്ന്നത്. പ്രകൃതിയും മനുഷ്യനും തമ്മിലുള്ള അഭേദ്യമായ ബന്ധം വിളിച്ചോതുന്നതായിരുന്നു ഇത്തവണത്തെയും കണി ഒരുക്കങ്ങള്.
മഞ്ഞപ്പട്ടുടുത്ത കണിക്കൊന്നപ്പൂക്കള്ക്കൊപ്പം പറമ്പിലെ പൊന്വെള്ളരിയും പഴുത്ത മാമ്പഴവും ചക്കയുമെല്ലാം ഉരുളിയില് ഇടംപിടിച്ചു. വാല്ക്കണ്ണാടിയും കോടിമുണ്ടും സ്വര്ണ്ണവും ധനലക്ഷ്മിയുടെ സാന്നിധ്യമായി കൃഷ്ണവിഗ്രഹത്തിന് മുന്നില് നിരന്നു. കഴിഞ്ഞ ദിവസങ്ങളില് നഗര-ഗ്രാമ വ്യത്യാസമില്ലാതെ വിപണികളെല്ലാം സജീവമായിരുന്നു. മീനച്ചൂടിനെ അവഗണിച്ചും കണിക്കോപ്പുകള് വാങ്ങാന് വലിയ തിരക്കാണ് അനുഭവപ്പെട്ടത്. വഴിയോര വാണിഭക്കാരും വിപണിയും ഒരുപോലെ ഈ ഉത്സവകാലത്തെ വരവേറ്റു.
സംസ്ഥാനത്തെ പ്രമുഖ ക്ഷേത്രങ്ങളിലെല്ലാം ഇന്ന് പുലര്ച്ചെ മുതല് പ്രത്യേക വിഷുക്കണി ദര്ശനം നടന്നു. ആയിരക്കണക്കിന് ഭക്തരാണ് പുണ്യം തേടി ക്ഷേത്രസന്നിധികളില് എത്തിയത്. വരും വര്ഷം മുഴുവന് ഐശ്വര്യം നിറയട്ടെ എന്ന പ്രാര്ത്ഥനയോടെയാണ് ഓരോ മലയാളിയും ഈ വിഷുവിനെ നെഞ്ചിലേറ്റുന്നത്. പ്രകൃതി കനിഞ്ഞുനല്കിയ വിഭവങ്ങളെ ആദരിക്കാനും വരുംതലമുറയ്ക്കായി അവയെ കാത്തുസൂക്ഷിക്കാനുമുള്ള ഒരു ഓര്മ്മപ്പെടുത്തല് കൂടിയാണ് ഓരോ വിഷുവും.
