ശ്രീനഗര്: ദേശീയ പതാകയുടെ നിറങ്ങളോടുള്ള ആദരസൂചകമായി ഉദ്ഘാടന റിബണ് മുറിക്കാന് വിസമ്മതിച്ച് ജമ്മു കശ്മീര് മുഖ്യമന്ത്രി ഒമര് അബ്ദുള്ള. ശ്രീനഗറിലെ കാശ്മീര് ഹാറ്റില് സംഘടിപ്പിച്ച കരകൗശല പ്രദര്ശനത്തിലാണ് മുഖ്യമന്ത്രി ഭരണാധികാരി എന്നതിലുപരി ഒരു പൗരന്റെ കടമ ഉയര്ത്തിപ്പിടിച്ചത്.
‘നോ യുവര് ആര്ട്ടിസാന്’ എന്ന പരിപാടിയുടെ ഉദ്ഘാടനത്തിനായി എത്തിയതായിരുന്നു മുഖ്യമന്ത്രി. എന്നാല് ഉദ്ഘാടനത്തിനായി കെട്ടിയിരുന്ന റിബണ് ദേശീയ പതാകയുടെ നിറത്തിലുള്ളതാണെന്ന് കണ്ടതോടെ അദ്ദേഹം കത്രിക താഴെ വെച്ചു. ദേശീയ പതാകയെ പ്രതിനിധീകരിക്കുന്ന നിറങ്ങള് മുറിക്കുന്നത് ഉചിതമല്ലെന്ന് വ്യക്തമാക്കിയ അദ്ദേഹം, റിബണ് മുറിക്കുന്നതിന് പകരം അത് അഴിച്ചുമാറ്റാന് ഉദ്യോഗസ്ഥരോട് നിര്ദ്ദേശിക്കുകയായിരുന്നു.
അഴിച്ചുമാറ്റിയ ത്രിവര്ണ്ണ റിബണ് അനാദരിക്കപ്പെടാതെ മടക്കി സൂക്ഷിക്കണമെന്നും അദ്ദേഹം ഓര്മ്മിപ്പിച്ചു. തുടര്ന്ന് റിബണ് നീക്കം ചെയ്ത ശേഷമാണ് അദ്ദേഹം പ്രദര്ശനം ഉദ്ഘാടനം ചെയ്തത്. സംഭവത്തിന്റെ ദൃശ്യങ്ങള് പുറത്തുവന്നതോടെ ഒമര് അബ്ദുള്ളയെ പ്രശംസിച്ച് നിരവധി പേര് രംഗത്തെത്തി. ചിഹ്നങ്ങളോടുള്ള ബഹുമാനം പ്രസംഗത്തിലല്ല, പ്രവൃത്തിയിലാണ് കാണിക്കേണ്ടതെന്ന് നെറ്റിസണ്സ് അഭിപ്രായപ്പെട്ടു. അതേസമയം, സര്ക്കാര് പരിപാടികളില് ഇത്തരം റിബണുകള് ഉപയോഗിക്കുന്നതിലെ അശ്രദ്ധയെ ചിലര് വിമര്ശിക്കുകയും ചെയ്തു.
കശ്മീരിലെ തനത് കരകൗശല മേഖലയെ പരിപോഷിപ്പിക്കുന്നതിനായി ജമ്മു കശ്മീര് ഹാന്ഡിക്രാഫ്റ്റ്സ് ആന്ഡ് ഹാന്ഡ്ലൂം വകുപ്പ് സംഘടിപ്പിച്ച ‘സൗള്ഫുള് കാശ്മീര്’ കാമ്പയിന്റെ ഭാഗമായിരുന്നു ഈ ചടങ്ങ്.
