നാസിക് : നാസിക് ടിസിഎസ് ആസ്ഥാനമായി നടന്ന മതപരിവര്ത്തന നീക്കങ്ങളില്, ഇരയാക്കപ്പെട്ട യുവാവ് പോലീസിന് നല്കിയ മൊഴി ഞെട്ടിപ്പിക്കുന്നതാണ്. വ്യക്തിപരമായ പ്രതിസന്ധികളെയും കുടുംബപ്രശ്നങ്ങളെയും പ്രതികള് എങ്ങനെ ആയുധമാക്കി മാറ്റിയെന്ന് ഈ വെളിപ്പെടുത്തലുകള് വ്യക്തമാക്കുന്നു. പ്രധാന പ്രതി തൗസിഫ് അത്താറിന്റെ ഫോണില് നിന്നും ലഭിച്ച രണ്ട് വര്ഷം പഴക്കമുള്ള ചിത്രമാണ് പോലീസിനെ പ്രധാന തെളിവുകളിലേക്ക് നയിച്ചത്. ചിത്രത്തില് വെള്ള തൊപ്പി ധരിച്ച് തൗസിഫിനൊപ്പം കണ്ട യുവാവ് സംഘത്തിലെ മറ്റൊരാളാണെന്നാണ് പോലീസ് ആദ്യം കരുതിയത്.
എന്നാല് ചോദ്യം ചെയ്യലില്, അയാള് പ്രതിയല്ലെന്നും ടിസിഎസിലെ സഹപ്രവര്ത്തകനും നേരത്തെ മതപരിവര്ത്തനത്തിന് വിധേയനായ ‘ഗോപാല്’ (യഥാര്ത്ഥ പേരല്ല) എന്ന യുവാവാണെന്നും വ്യക്തമായി. യുവാവിന്റെ വേഷവിധാനത്തിലും പെരുമാറ്റത്തിലും വന്ന മാറ്റങ്ങള് ഇരയെ എങ്ങനെ ഘട്ടംഘട്ടമായി സ്വാധീനിച്ചു എന്നതിന്റെ തെളിവായി പോലീസ് കണക്കാക്കുന്നു. ജീവിതത്തിലെ ഏറ്റവും ദുര്ബലമായ നിമിഷങ്ങളിലാണ് ഇരയെ പ്രതികള് സമീപിച്ചതെന്ന് മൊഴിയില് പറയുന്നു.
‘2023 മാര്ച്ചില് പിതാവിന് പക്ഷാഘാതം സംഭവിച്ചതോടെ ഞാന് വലിയ മാനസിക സമ്മര്ദ്ദത്തിലായിരുന്നു. ഈ തളര്ച്ച മുതലെടുത്താണ് സഹപ്രവര്ത്തകര് അവരുടെ മതത്തെക്കുറിച്ച് സംസാരിച്ചു തുടങ്ങിയത്. സ്വന്തം വിശ്വാസങ്ങള് തെറ്റാണെന്നും അവരുടെ രീതികള് പിന്തുടര്ന്നാല് ജീവിതത്തിലെ ദുരിതങ്ങള് മാറുമെന്നും ഇവര് യുവാവിനെ വിശ്വസിപ്പിച്ചു. നിരന്തരമായി വീഡിയോകള് അയച്ചു നല്കിയും മതപരമായ ചടങ്ങുകളില് പങ്കെടുപ്പിച്ചും യുവാവിന്റെ ചിന്താഗതി മാറ്റിയെടുക്കാനാണ് ഇവര് ശ്രമിച്ചത്.
കാലക്രമേണ സൗഹൃദപൂര്വ്വമായ ഇടപെടലുകള് സമ്മര്ദ്ദമായി മാറി. ഗോപാല് എന്ന പേര് മാറ്റി മുസ്ലിം പേര് സ്വീകരിക്കാന് ശക്തമായ സമ്മര്ദ്ദം ചെലുത്തി. തുടര്ന്ന് ‘ഗുല്ഷന്’ എന്ന പേര് യുവാവ് സ്വീകരിക്കേണ്ടി വന്നു. യുവാവിന്റെ സ്വന്തം മതത്തെക്കുറിച്ച് മോശമായി സംസാരിക്കുകയും കുടുംബത്തിന് അപകടം സംഭവിക്കുമെന്ന് ഭീഷണിപ്പെടുത്തി ഭയം സൃഷ്ടിക്കുകയും ചെയ്തു. എതിര്പ്പുകള് പ്രകടിപ്പിച്ചിട്ടും വിവിധ സ്ഥലങ്ങളില് കൊണ്ടുപോയി ആചാരങ്ങളില് പങ്കെടുപ്പിച്ചു.
ഓഫീസ് അന്തരീക്ഷത്തില് ഇത്രയും ആസൂത്രിതമായി ഇത്തരം പ്രവര്ത്തനങ്ങള് നടന്നത് അതീവ ഗൗരവത്തോടെയാണ് പോലീസ് കാണുന്നത്. ഇതില് കൂടുതല് പേര് ഉള്പ്പെട്ടിട്ടുണ്ടോ എന്നും ഡിജിറ്റല് തെളിവുകള് ഉപയോഗിച്ച് മറ്റ് ഇരകള് ആരെങ്കിലുമുണ്ടോ എന്നും പോലീസ് പരിശോധിച്ചു വരികയാണ്. കൃത്യമായ തെളിവുകള് ശേഖരിച്ച് ഈ ശൃംഖലയുടെ വേരുകള് കണ്ടെത്താനാണ് അന്വേഷണ സംഘത്തിന്റെ നീക്കം.
