പഹല്ഗാം: വിനോദസഞ്ചാരികളുടെ സുരക്ഷ ഉറപ്പാക്കുന്നതിനും സേവനദാതാക്കളുടെ ആധികാരികത പരിശോധിക്കുന്നതിനുമായി ജമ്മു കശ്മീര് അധികൃതര് പഹല്ഗാമില് ക്യുആര് കോഡ് അധിഷ്ഠിത തിരിച്ചറിയല് സംവിധാനം ഏര്പ്പെടുത്തി. കഴിഞ്ഞ വര്ഷം ബൈസരന് പുല്മേട്ടിലുണ്ടായ ഭീകരാക്രമണത്തിന്റെ പശ്ചാത്തലത്തിലാണ് വിനോദസഞ്ചാരികളുടെ ആത്മവിശ്വാസം വീണ്ടെടുക്കാന് ഈ നീക്കം. കുതിര സവാരിക്കാര്, തെരുവ് കച്ചവടക്കാര്, കടയുടമകള്, മറ്റ് പുറംനാട്ടു വ്യാപാരികള് എന്നിവരുള്പ്പെടെ ടൂറിസം മേഖലയുമായി ബന്ധപ്പെട്ട എല്ലാ സേവനദാതാക്കള്ക്കും പ്രത്യേക ക്യുആര് കോഡുകള് നല്കിയിട്ടുണ്ട്. വിനോദസഞ്ചാരികള്ക്ക് തങ്ങളുടെ മൊബൈല് ഫോണ് ഉപയോഗിച്ച് ഈ കോഡ് സ്കാന് ചെയ്യുന്നതിലൂടെ സേവനദാതാവിന്റെ വിവരങ്ങള് തത്സമയം പരിശോധിക്കാന് സാധിക്കും.
പേര്, വിലാസം, മൊബൈല് നമ്പര്, രക്ഷിതാക്കളുടെ വിവരങ്ങള്, രജിസ്ട്രേഷന് നമ്പറും പ്രവര്ത്തന പരിധിയും, ആധാര് വിവരങ്ങളും പോലീസ് വെരിഫിക്കേഷന് സ്റ്റാറ്റസും എന്നിവ തിരിച്ചറിയാന് സാധിക്കും. പോലീസ് കൃത്യമായി പരിശോധന നടത്തി രജിസ്റ്റര് ചെയ്തവര്ക്ക് മാത്രമേ ക്യുആര് കോഡ് അനുവദിക്കൂ. ഇത് വ്യാജന്മാരെയും നിയമവിരുദ്ധമായി പ്രവര്ത്തിക്കുന്നവരെയും തിരിച്ചറിയാന് സഹായിക്കും. വിനോദസഞ്ചാരികള്ക്ക് തങ്ങള് ഇടപെടുന്നത് അംഗീകൃത സേവനദാതാക്കളോടാണെന്ന് ഉറപ്പുവരുത്താന് ഈ സംവിധാനം സഹായിക്കും. ടൂറിസം രംഗത്തെ സാമ്പത്തിക തട്ടിപ്പുകളും മറ്റും ഒഴിവാക്കാന് ഇതിലൂടെ സാധിക്കും.
അധികൃതരുടെ ഈ നടപടിയെ ടൂറിസം മേഖലയിലെ തൊഴിലാളികള് സ്വാഗതം ചെയ്തു. തങ്ങളുടെ വിവരങ്ങള് ലോക്കല് പോലീസ് സ്റ്റേഷനുമായി ബന്ധിപ്പിച്ചിട്ടുണ്ടെന്നും സുരക്ഷാ ഉദ്യോഗസ്ഥര് ഇടയ്ക്കിടെ ക്യുആര് കോഡുകള് പരിശോധിച്ച് ഉറപ്പുവരുത്തുന്നുണ്ടെന്നും കുതിര സവാരി നടത്തുന്ന ഗുലാം ഹസ്സന് പറഞ്ഞു. ജമ്മു കശ്മീരിന് പുറത്തുനിന്നുള്ള വ്യാപാരികളെയും കണിശമായ പോലീസ് പരിശോധനയ്ക്ക് ശേഷമാണ് പ്രവര്ത്തനത്തിന് അനുവദിക്കുന്നത്.
കഴിഞ്ഞ വര്ഷം ഏപ്രിലില് വിനോദസഞ്ചാരികള്ക്കും ഒരു പ്രാദേശിക കുതിര സവാരിക്കാരനും ജീവന് നഷ്ടപ്പെട്ട ആക്രമണത്തിന് ശേഷം ആനന്ദ്നാഗ് ജില്ലയിലെ ടൂറിസം മേഖലയില് സുരക്ഷാ സംവിധാനങ്ങള് വലിയ തോതില് ശക്തമാക്കിയിട്ടുണ്ട്. പുതിയ പരിഷ്കാരം പഹല്ഗാമിലെ സുരക്ഷാ അന്തരീക്ഷം മെച്ചപ്പെടുത്തുമെന്നാണ് അധികൃതരുടെ പ്രതീക്ഷ.
