കണ്ണൂര്‍: കെഎസ്‌യു കണ്ണൂര്‍ ജില്ലാ പ്രസിഡന്റ് എം.സി. അതുലിനെതിരെ ഗുരുതരമായ ആരോപണങ്ങളുമായി സഹപ്രവര്‍ത്തകയായ യുവതി രംഗത്തെത്തി. ലൈംഗിക ഉദ്ദേശ്യത്തോടെ ശരീരത്തില്‍ സ്പര്‍ശിച്ചുവെന്നും വിവാഹവാഗ്ദാനം നല്‍കി ലക്ഷക്കണക്കിന് രൂപ തട്ടിയെടുത്ത് വഞ്ചിച്ചുവെന്നുമാണ് പരാതി. യുവതിയുടെ മൊഴിയുടെ അടിസ്ഥാനത്തില്‍ കണ്ണൂര്‍ വനിതാ പോലീസ് കേസെടുത്തു. 2018 മുതല്‍ അതുലുമായി സൗഹൃദത്തിലായിരുന്ന യുവതിക്ക്, ഈ വര്‍ഷം ഒരു യാത്രയ്‌ക്കിടെയാണ് മോശം അനുഭവം ഉണ്ടായത്. ലൈംഗിക താല്‍പ്പര്യത്തോടെ അതുല്‍ തന്നോട് പെരുമാറിയെന്ന് യുവതി വ്യക്തമാക്കുന്നു.
വിവിധ ഘട്ടങ്ങളിലായി 1,60,000 രൂപ യുവതിയില്‍ നിന്ന് കൈക്കലാക്കി. വിവാഹം കഴിക്കാമെന്ന ഉറപ്പിലായിരുന്നു ഈ പണമിടപാടുകള്‍. എന്നാല്‍ പിന്നീട് വിവാഹവാഗ്ദാനത്തില്‍ നിന്ന് പിന്മാറി വഞ്ചിക്കുകയായിരുന്നു. പരാതിയുമായി മുന്നോട്ട് പോകുമെന്ന് ഉറപ്പായതോടെ കേസ് ഒതുക്കിത്തീര്‍ക്കാനും പരാതി പിന്‍വലിപ്പിക്കാനും വലിയ തോതിലുള്ള സമ്മര്‍ദ്ദം ഉണ്ടായതായും യുവതി ആരോപിച്ചു. മുഖ്യമന്ത്രിക്കും സിറ്റി പോലീസ് കമ്മീഷണര്‍ക്കും നല്‍കിയ പരാതിയെത്തുടര്‍ന്നാണ് വനിതാ പോലീസ് നടപടി സ്വീകരിച്ചത്.
നിലവില്‍ എഫ്ഐആര്‍ രജിസ്റ്റര്‍ ചെയ്ത് അന്വേഷണം ആരംഭിച്ചെങ്കിലും പ്രതിയായ അതുല്‍ ഒളിവിലാണെന്നാണ് പോലീസ് നല്‍കുന്ന സൂചന. ഇയാള്‍ക്കായി തിരച്ചില്‍ ഊര്‍ജിതമാക്കിയിട്ടുണ്ട്. രാഷ്‌ട്രീയ വൃത്തങ്ങളില്‍ വലിയ ചര്‍ച്ചയായിരിക്കുന്ന ഈ സംഭവം സംഘടനയ്‌ക്കുള്ളിലും വലിയ പ്രതിസന്ധിയാണ് സൃഷ്ടിച്ചിരിക്കുന്നത്.
