തിരുവനന്തപുരം: പ്രമുഖ നടന് മണിയന്പിള്ള രാജു പ്രതിയായ വാഹനാപകടക്കേസില് നിര്ണ്ണായക വഴിത്തിരിവ്. അപകടസമയത്ത് താരം മദ്യപിച്ചിരുന്നില്ലെന്ന് കെമിക്കല് പരിശോധനാ റിപ്പോര്ട്ട് സ്ഥിരീകരിച്ചു. ഇതോടെ, അദ്ദേഹത്തിനെതിരെ പോലീസ് ചുമത്തിയിരുന്ന മദ്യപിച്ച് വാഹനമോടിക്കല് എന്ന ഗുരുതരമായ കുറ്റം ഒഴിവാക്കാന് കോടതി അനുമതി നല്കി. പരിശോധനാ ഫലം പുറത്തുവന്നതിന് പിന്നാലെ പ്രതികരണവുമായി മണിയന്പിള്ള രാജു തന്നെ രംഗത്തെത്തി.
‘2022-ല് മദ്യപാനം പൂര്ണ്ണമായും ഉപേക്ഷിച്ചയാളാണ് ഞാന്. ആരോഗ്യപരമായ കാരണങ്ങളാല് ഇനി മദ്യപിക്കില്ലെന്ന് ഡോക്ടര്ക്ക് വാക്ക് നല്കിയിട്ടുണ്ട്. അനാവശ്യമായ ആരോപണങ്ങളില് നിന്ന് മുക്തനായതിലും സത്യം പുറത്തുവന്നതിലും വലിയ സന്തോഷമുണ്ട്.’ – അദ്ദേഹം പറഞ്ഞു. ഫെബ്രുവരി അഞ്ചിന് രാത്രി ട്രിവാന്ഡ്രം ക്ലബിന് മുന്നിലായിരുന്നു കേസിനാസ്പദമായ അപകടം നടന്നത്. ക്ലബില് നിന്ന് റോഡിലേക്ക് കാര് ഇറക്കുന്നതിനിടെ രണ്ട് യുവാക്കള് സഞ്ചരിച്ച ബൈക്ക് കാറില് വന്നിടിക്കുകയായിരുന്നു.
പുറത്തുവന്ന സിസിടിവി ദൃശ്യങ്ങള് പ്രകാരം, കാര് വളരെ സാവധാനമാണ് റോഡിലേക്ക് പ്രവേശിച്ചത്. എന്നാല് അമിതവേഗതയിലെത്തിയ ബൈക്ക് കാറില് ഇടിക്കുകയായിരുന്നുവെന്ന് ദൃശ്യങ്ങള് സൂചിപ്പിക്കുന്നു. അപകടത്തില് ബൈക്ക് യാത്രക്കാരായ നിദേവ്, സൂരജ് എന്നിവര്ക്ക് സാരമായ പരിക്കേറ്റിരുന്നു. മദ്യപാനക്കുറ്റം ഒഴിവാക്കിയെങ്കിലും, അപകടത്തിന് ശേഷം നിര്ത്തിയില്ല എന്ന കാരണത്താല് ‘ഹിറ്റ് ആന്ഡ് റണ്’ കേസ് ഇപ്പോഴും നിലനില്ക്കുന്നുണ്ട്.
അപകടം നടന്നതിന്റെ പിറ്റേന്ന് രാവിലെ തന്നെ താരം പോലീസ് സ്റ്റേഷനില് ഹാജരാവുകയും അറസ്റ്റ് രേഖപ്പെടുത്തി ജാമ്യത്തില് വിടുകയും ചെയ്തിരുന്നു. നിലവില് കേസില് തുടരന്വേഷണം നടക്കുകയാണ്. കെമിക്കല് ലാബ് റിപ്പോര്ട്ട് ലഭിക്കാന് വൈകിയത് നേരത്തെ വലിയ വിവാദങ്ങള്ക്ക് വഴിതെളിച്ചിരുന്നു. എന്നാല് ഇപ്പോള് ശാസ്ത്രീയമായ തെളിവുകള് പുറത്തുവന്നത് താരത്തിന് വലിയ ആശ്വാസമായിരിക്കുകയാണ്.
