തിരുവനന്തപുരം: സംസ്ഥാനത്ത് മഴ വീണ്ടും ശക്തമാകുമെന്ന കാലാവസ്ഥാ മുന്നറിയിപ്പിനെ തുടര്ന്ന് പത്തനംതിട്ട, ആലപ്പുഴ, കോട്ടയം, വയനാട്, കാസര്കോട് ജില്ലകളിലെ എല്ലാ വിദ്യാഭ്യാസ സ്ഥാപനങ്ങള്ക്കും നാളെ (വെള്ളി) അവധി പ്രഖ്യാപിച്ചു. അതത് ജില്ലകളിലെ ജില്ലാ കളക്ടര്മാരാണ് ഉത്തരവിറക്കിയത്. അങ്കണവാടികള് മുതല് പ്രൊഫഷണല് കോളേജുകള് വരെ, ട്യൂഷന് സെന്ററുകള്, കോച്ചിങ് ക്ലാസുകള്, സ്പെഷ്യല് ക്ലാസുകള്, മതപഠന കേന്ദ്രങ്ങള് എന്നിവയ്ക്കും അവധി ബാധകമായിരിക്കും.
മുന്കൂട്ടി നിശ്ചയിച്ചിട്ടുള്ള പൊതു പരീക്ഷകള്, സര്വകലാശാല പരീക്ഷകള്, അഭിമുഖങ്ങള് എന്നിവയ്ക്ക് അവധി ബാധകമല്ലെന്ന് ജില്ലാ ഭരണകൂടം വ്യക്തമാക്കി. പത്തനംതിട്ട റെഡ് അലര്ട്ടിന്റെയും ഓറഞ്ച് അലര്ട്ടിന്റെയും പശ്ചാത്തലത്തില് എല്ലാ വിദ്യാഭ്യാസ സ്ഥാപനങ്ങള്ക്കും അവധി. ആലപ്പുഴ വെള്ളക്കെട്ട്, ദുരിതാശ്വാസ ക്യാമ്പുകളുടെ പ്രവര്ത്തനം, മഴ മുന്നറിയിപ്പ് എന്നിവ കണക്കിലെടുത്ത് എല്ലാ വിദ്യാഭ്യാസ സ്ഥാപനങ്ങള്ക്കും അവധി.
കോട്ടയം പ്രൊഫഷണല് കോളേജുകള് ഉള്പ്പെടെ എല്ലാ വിദ്യാഭ്യാസ സ്ഥാപനങ്ങള്ക്കും അവധി. വയനാട് പ്രൊഫഷണല് കോളേജുകള്, ട്യൂഷന് സെന്ററുകള്, കോച്ചിങ് ക്ലാസുകള്, മതപഠന ക്ലാസുകള് ഉള്പ്പെടെ എല്ലാ വിദ്യാഭ്യാസ സ്ഥാപനങ്ങള്ക്കും അവധി. കാസര്കോട് ഓറഞ്ച് അലര്ട്ട് തുടരുന്ന സാഹചര്യത്തില് എല്ലാ വിദ്യാഭ്യാസ സ്ഥാപനങ്ങള്ക്കും അവധി.
വയനാട്ടിലെ റസിഡന്ഷ്യല് വിദ്യാഭ്യാസ സ്ഥാപനങ്ങള്ക്ക് അവധി ബാധകമല്ല. അവിടെയുള്ള വിദ്യാര്ഥികളുടെ സുരക്ഷ ഉറപ്പാക്കാന് സ്ഥാപന മേധാവികള് ആവശ്യമായ മുന്കരുതലുകള് സ്വീകരിക്കണമെന്ന് ജില്ലാ ഭരണകൂടം നിര്ദേശിച്ചു. അതിതീവ്ര മഴയ്ക്ക് സാധ്യത തുടരുന്നതിനാല് ജനങ്ങള് ജാഗ്രത പാലിക്കണമെന്നും, അനാവശ്യ യാത്രകള് ഒഴിവാക്കി ജില്ലാ ഭരണകൂടത്തിന്റെയും ദുരന്തനിവാരണ അതോറിറ്റിയുടെയും നിര്ദേശങ്ങള് പാലിക്കണമെന്നും അധികൃതര് അഭ്യര്ഥിച്ചു.
