കുരുക്ഷേത്ര: ഹരിയാനയിലെ കുരുക്ഷേത്ര ജില്ലയിലുള്ള പ്രേം നഗര് കോളനിയില് ഒരു കുടുംബത്തിലെ മൂന്ന് പേരെ വീടിനുള്ളില് തൂങ്ങിമരിച്ച നിലയില് കണ്ടെത്തി. റെയില്വേ മെയില് സര്വീസിലെ ജീവനക്കാരനായ ജതീന്ദര് കുമാര് (30), ഭാര്യ മഞ്ജു (28), ഇവരുടെ മൂന്ന് വയസ്സുള്ള മകള് അദ്വിക എന്നിവരാണ് മരിച്ചത്. തിങ്കളാഴ്ച രാവിലെയാണ് സംഭവം പുറത്തറിഞ്ഞത്.
തിങ്കളാഴ്ച രാവിലെ 6:30-ഓടെയാണ് പ്രേം നഗറിലെ വീടിനുള്ളില് മൂന്ന് പേര് ആത്മഹത്യ ചെയ്ത നിലയിലുണ്ടെന്ന വിവരം സുഭാഷ് മണ്ടി പോലീസ് പോസ്റ്റില് ലഭിക്കുന്നത്. പോലീസ് സ്ഥലത്തെത്തുമ്പോള് ദമ്പതികളെയും കുഞ്ഞിനെയും സീലിംഗ് ഫാനില് തൂങ്ങിയ നിലയില് കണ്ടെത്തുകയായിരുന്നു. ഉടന് തന്നെ ആശുപത്രിയില് എത്തിച്ചെങ്കിലും മൂവരും നേരത്തെ തന്നെ മരിച്ചതായി ഡോക്ടര്മാര് സ്ഥിരീകരിച്ചു.
കുട്ടിയുടെ നീണ്ടുനില്ക്കുന്ന അസുഖത്തെത്തുടര്ന്ന് കുടുംബം കടുത്ത മാനസിക വിഷമത്തിലായിരുന്നുവെന്ന് പ്രാഥമിക അന്വേഷണത്തില് വ്യക്തമായി. സംഭവസ്ഥലത്തുനിന്ന് ആത്മഹത്യാക്കുറിപ്പ് കണ്ടെടുത്തിട്ടുണ്ട്. കുട്ടിയുടെ ജീവനെടുത്ത ശേഷം മാതാപിതാക്കള് ആത്മഹത്യ ചെയ്തതാകാമെന്നാണ് പോലീസ് നിഗമനം. ജതീന്ദറിന്റെ പിതാവ് മഹേന്ദ്ര സിംഗ് ആറുമാസം മുമ്പാണ് അന്തരിച്ചത്.
ജതീന്ദറിന്റെ അമ്മ ബിംലാ ദേവിയാണ് ഇപ്പോള് കുടുംബത്തില് അവശേഷിക്കുന്ന ഏക അംഗം. ഏക സഹോദരന് പ്രതീക് കുടുംബത്തോടൊപ്പം കാനഡയിലാണ് താമസം. കൃഷ്ണ ഗേറ്റ് പോലീസ് സ്റ്റേഷന് എസ്.എച്ച്.ഒ ബല്ജിത് സിംഗിന്റെ നേതൃത്വത്തില് ഇന്ക്വസ്റ്റ് നടപടികള് പൂര്ത്തിയാക്കി മൃതദേഹങ്ങള് പോസ്റ്റ്മോര്ട്ടത്തിനായി അയച്ചു. കണ്ടെടുത്തിട്ടുള്ള ആത്മഹത്യാക്കുറിപ്പ് വിശദമായ പരിശോധനയ്ക്ക് വിധേയമാക്കുമെന്നും കൂടുതല് അന്വേഷണം നടന്നുവരികയാണെന്നും പോലീസ് അറിയിച്ചു.
