തിരുവനന്തപുരം: ഡെന്റൽ വിദ്യാര്ത്ഥി നിതിന് രാജ് മരിച്ച സംഭവത്തില് അധ്യാപകരുടെ മുന്കൂര് ജാമ്യാപേക്ഷയില് വിധി ഈ മാസം 25-ന്. കേസില് വാദം പൂര്ത്തിയായി. ഏപ്രിൽ പതിനേഴിനാണ് ഡോ. റാമും സംഗീത നമ്പ്യാരും കേസില് മുന്കൂര് ജാമ്യാപേക്ഷ നല്കിയത്. തലശ്ശേരി ജില്ലാ സെഷന്സ് കോടതിയിലാണ് ജാമ്യാപേക്ഷ നല്കിയത്. നിതിന്റെ മരണത്തില് പങ്കില്ലെന്നും ആത്മഹത്യയ്ക്ക് കാരണം ലോണ് ആപ്പിന്റെ ഭീഷണി മൂലമാണെന്നുമാണ് അധ്യാപകര് മുന്കൂര് ജാമ്യാപേക്ഷയില് ആരോപിക്കുന്നത്. സംഭവ ദിവസം പ്രിന്സിപ്പലിന്റെ റൂമില് താന് ഇല്ലായിരുന്നുവെന്നും റാം പറയുന്നു.
ഡോ. റാമും സംഗീതയും ഒളിവില് തുടരുകയാണ്. ഇരുവരെയും പിടികൂടാന് വൈകുന്നതില് പൊലീസിനെതിരെ വിമര്ശനം ശക്തമാകുന്നതിനിടെയാണ് മുന്കൂര് ജാമ്യാപേക്ഷ നല്കിയത്. എം കെ റാമിനെയും സംഗീതയെയും കോളേജ് സസ്പെന്ഡ് ചെയ്യുകയും റാമിനെ കഴിഞ്ഞ ദിവസം മാനേജ്മെന്റ് പുറത്താക്കുകയും ചെയ്തിരുന്നു.
‘ദാറ്റ് ഇഡിയറ്റ് സിമ്പതിക്ക് വേണ്ടി ചാടി’ എന്ന് വകുപ്പ് മേധാവി എം കെ റാം പറയുന്നത് കേട്ടുവെന്ന് നിതിന്റെ സഹപാഠി മൊഴി നല്കിയിട്ടുണ്ട്. ഡോ. റാം ഒബിസി വിഭാഗത്തില്പ്പെടുന്ന വ്യക്തിയാണ് എന്നാണ് പ്രോസിക്യൂഷന്റെ വാദം.ഏപ്രില് പത്തിനാണ് നിതിന് രാജ് കോളേജ് കെട്ടിടത്തില് നിന്നും ചാടി ജീവനൊടുക്കിയതായി കുടുംബം അറിയുന്നത്.
വകുപ്പ് മേധാവി റാം മാനസികമായി പീഡിപ്പിക്കുന്നുണ്ടെന്ന് നിതിന് നേരത്തെ തന്നെ കുടുംബത്തെ അറിയിച്ചിരുന്നു. നിറത്തിന്റെയും ജാതിയുടെയും പേരിലായിരുന്നു അധിക്ഷേപം. ഇന്റേണല് മാര്ക്കുമായി ബന്ധപ്പെട്ട തര്ക്കങ്ങളുമുണ്ടായിരുന്നു.
