തിരുവനന്തപുരം: സംസ്ഥാനത്ത് താപനില അസാധാരണമായി ഉയരാൻ സാധ്യതയുള്ളതിനാൽ കർശന മുൻകരുതലുകൾ പാലിക്കണമെന്ന് ദേശീയ ദുരന്തനിവാരണ അതോറിറ്റി അറിയിച്ചു. രണ്ട് ദിവസം പകൽ സമയങ്ങളിൽ ലോക്ഡൗണിന് സമാനമായ ജാഗ്രത പാലിക്കണമെന്നാണ് നിർദ്ദേശം. പകൽ സമയങ്ങളിൽ അത്യാവശ്യങ്ങൾക്കല്ലാതെ പുറത്തിറങ്ങുന്നത് ഒഴിവാക്കണം.
പാലക്കാട് ജില്ലയിൽ 40 ഡിഗ്രി സെൽഷ്യസ് വരെ താപനില ഉയരാൻ സാധ്യതയുണ്ട്. മറ്റ് ജില്ലകളിലും പതിവിനേക്കാൾ കൂടുതൽ ചൂട് അനുഭവപ്പെട്ടേക്കും. മറ്റന്നാൾ മുതൽ വേനൽ മഴ ശക്തമാകാൻ സാധ്യതയുണ്ടെന്നും അധികൃതർ അറിയിച്ചിട്ടുണ്ട്. പകൽ 11 മണി മുതൽ മൂന്ന് മണി വരെയുള്ള സമയങ്ങളിൽ നേരിട്ട് വെയിൽ ഏൽക്കാതിരിക്കാൻ പ്രത്യേകം ശ്രദ്ധിക്കണമെന്ന് ആരോഗ്യവകുപ്പും മുന്നറിയിപ്പ് നൽകിയിട്ടുണ്ട്. നിലവിലെ സാഹചര്യങ്ങൾ വിലയിരുത്തുന്നതിനായി മുഖ്യമന്ത്രി പിണറായി വിജയൻ ഇന്ന് ഉന്നതതല യോഗം വിളിച്ചിട്ടുണ്ട്.
