ബാര്മര്: ലോകത്തിലെ അതിവേഗം വളരുന്ന സാമ്പത്തിക ശക്തിയായ ഭാരതത്തെ തളയ്ക്കാന് വിദേശ ശക്തികള് നടത്തുന്ന ‘അദൃശ്യ യുദ്ധത്തിന്റെ’ ഭാഗമാണോ രാജസ്ഥാനിലെ പച്പദ്ര റിഫൈനറി സ്ഫോടനം എന്ന് ദേശീയ അന്വേഷണ ഏജന്സി പരിശോധിക്കുന്നു. പ്രധാനമന്ത്രി നരേന്ദ്ര മോദിയുടെ സ്വപ്ന പദ്ധതികളിലൊന്നായ ഈ റിഫൈനറിക്ക് നേരെയുണ്ടായ നീക്കം രാജ്യത്തിന്റെ ഊര്ജ്ജ സ്വയംപര്യാപ്തതയെ ലക്ഷ്യം വെച്ചുള്ളതാണെന്ന് സുരക്ഷാ വിദഗ്ധര് വിലയിരുത്തുന്നു.
കഴിഞ്ഞ 50 ദിവസത്തിനുള്ളില് ഭാരതം ഉള്പ്പെടെ ലോകത്തെ ആറ് പ്രമുഖ രാജ്യങ്ങളിലെ എണ്ണ ശുദ്ധീകരണ ശാലകളില് സമാനമായ അപകടങ്ങള് റിപ്പോര്ട്ട് ചെയ്തിട്ടുണ്ട്. ഇത് കേവലം യാദൃശ്ചികമല്ലെന്നും, ആഗോളതലത്തില് ഇന്ധന വിപണിയില് അസ്ഥിരതയുണ്ടാക്കാന് ആസൂത്രിതമായി നടത്തുന്ന നീക്കമാണെന്നുമാണ് സൂചന. ഇറാഖ്, റഷ്യ, മെക്സിക്കോ തുടങ്ങിയ രാജ്യങ്ങളിലെ എണ്ണ പ്ലാന്റുകളില് ഉണ്ടായ സ്ഫോടനങ്ങളുടെ മാതൃക എന്.ഐ.എ സസൂക്ഷ്മം നിരീക്ഷിക്കുന്നു.
അമേരിക്കയിലെ ടെക്സസ്, ഓസ്ട്രേലിയയിലെ വിക്ടോറിയ എന്നിവിടങ്ങളില് റിഫൈനറികള്ക്ക് നേരെ ആക്രമണങ്ങള് നടന്നു. യുക്രെയ്ന് യുദ്ധ പശ്ചാത്തലത്തില് റഷ്യന് റിഫൈനറികള്ക്ക് നേരെയുണ്ടായ നീക്കങ്ങള് ആഗോള ഇന്ധന വിതരണത്തെ ബാധിച്ചിരുന്നു. ഏപ്രില് 20-ന് രാജസ്ഥാനില് തീപിടുത്തം ഉണ്ടായ അതേ ദിവസം തന്നെ റൊമാനിയയിലെ ഊര്ജ്ജ നിലയത്തിലും സ്ഫോടനം ഉണ്ടായത് ആസൂത്രിത നീക്കത്തിന്റെ തെളിവായി കരുതപ്പെടുന്നു.
റഷ്യയില് നിന്ന് കുറഞ്ഞ നിരക്കില് ക്രൂഡ് ഓയില് വാങ്ങി അത് ശുദ്ധീകരിച്ച് യൂറോപ്പിലേക്കും മറ്റും വന്തോതില് കയറ്റുമതി ചെയ്യുന്ന ഹബ്ബായി ഭാരതം മാറിയിട്ടുണ്ട്. മോദി സര്ക്കാരിന്റെ ഈ നയതന്ത്ര വിജയം പല വിദേശ ശക്തികളെയും അലോസരപ്പെടുത്തുന്നു. പച്പദ്ര റിഫൈനറി പൂര്ണ്ണതോതില് പ്രവര്ത്തനസജ്ജമാകുന്നതോടെ ഭാരതത്തിന്റെ ഇറക്കുമതി ചെലവ് കുത്തനെ ഇടിയുമായിരുന്നു. ഈ സാമ്പത്തിക നേട്ടം തടയാന് സൈബര് ആക്രമണമോ സാങ്കേതിക അട്ടിമറിയോ നടന്നിട്ടുണ്ടോ എന്നാണ് അന്വേഷണ സംഘം വ്യക്തമാക്കുന്നത്.
അപകടത്തിന് നാല് ദിവസം മുന്പ് തന്നെ ഇന്ത്യന് റിഫൈനറികള്ക്ക് നേരെ അട്ടിമറിക്ക് സാധ്യതയുണ്ടെന്ന തരത്തില് സാമൂഹ്യമാധ്യമങ്ങളില് പ്രചരിച്ച മുന്നറിയിപ്പുകളെ കേന്ദ്ര ഇന്റലിജന്സ് അതീവ ഗൗരവത്തോടെയാണ് കാണുന്നത്. ‘രാജ്യത്തിന്റെ വികസനത്തെ പിന്നോട്ടടിക്കാന് ശ്രമിക്കുന്ന ഏത് അദൃശ്യ കരങ്ങളെയും നിയമത്തിന് മുന്നില് കൊണ്ടുവരും. ഭാരതത്തിന്റെ അഭിമാന പദ്ധതികള്ക്ക് നേരെ ഉയരുന്ന ഭീഷണികളെ ഉരുക്കുമുഷ്ടി കൊണ്ട് നേരിടും.’ – ആഭ്യന്തര മന്ത്രാലയ വൃത്തങ്ങള് അറിയിച്ചു.
ഭാരതത്തെ ലോകത്തിന്റെ ഊര്ജ്ജ ഭൂപടത്തില് ഒന്നാമതെത്തിക്കാനുള്ള കേന്ദ്ര സര്ക്കാരിന്റെ ദൗത്യത്തിന് തടസ്സം നില്ക്കുന്ന വിദേശ ഏജന്സികളെയും ഭീകര സംഘടനകളെയും പുറത്തുകൊണ്ടുവരാന് എന്.ഐ.എക്കൊപ്പം ഐ.ബി ഉള്പ്പെടെയുള്ള ഏജന്സികളും രംഗത്തുണ്ട്. സൈബര് തന്ത്രങ്ങള് വഴിയുള്ള അട്ടിമറി സാധ്യതകള് കണ്ടെത്താന് ഉന്നതതല സാങ്കേതിക വിദഗ്ധരും പരിശോധനയില് പങ്കുചേരുന്നു.
